Sportshyǵa dene jattyǵýynan bólek, myqty erik-jiger kerek — parasportshy
Mańǵystaýlyq parasportshy Ǵanı Isentemırov sportshy úshin dene jattyǵýynan bólek, myqty erik-jiger, alǵa qoıǵan maqsatqa qol jetkizýdegi qulshynys asa mańyzdy ekenin aıtady. Onyń basty maqsaty — Paralımpıada oıyndaryna joldama alý, dep habarlaıdy Kazinform.
Ǵanı Isentemırov — parapaýerlıftıngten 7 dúrkin QR chempıony ári 11 rekordtyń ıesi, QR-nyń Halyqaralyq sport sheberi.
2021 jyly Ulybrıtanııanyń Manchester qalasynda ótken Álem kýboginiń qola júldesin jáne Taılandtyń Bangkok qalasynda ótken týrnırde qola júldeni jeńip aldy. 2023 jyly Dýbaı qalasynda (BAÁ) Álem Chempıonatyna qatysyp, Para Azııa oıyndaryna joldama aldy. 22-28 qazan aralyǵynda Qytaıdyń Handjoý qalasynda ótken Para Azııa oıyndarynda parapaýerlıftıngten altynshy orynǵa ıe boldy.
— Men bala kezimnen sportpen shuǵyldanamyn. 4 jyl dzıýdomen, 3 jyl bokspen, 7 jyl kıkbokspen aınalystym. Bul sporttardan da respýblıka, oblys deńgeıinde jaqsy nátıjege qol jetkizdim, - deıdi parasportshy.
Osydan on jyl buryn Ǵanı oń aıaǵynan aýyr jaraqat alyp, dárigerler sheshimine sáıkes ampýtatsııa jasaýǵa týra keldi. Bul jaǵdaıdan keıin 6 jyl shamasynda sporttan qol úzgen. Al, 2018 jyldan bastap voleıboldy otyryp oınaýǵa qaıta den qoıa bastady. 2019 sáýir aıynda parapaýerlıftıng sportynan bapker Arslan Sýıýnshalıev parasportshynyń iri dene bitimin baıqap parapaýerlıftıng sport túrimen shuǵyldanýǵa keńes beredi. Ǵanı jattyqtyrýshynyń qoldaýyn sezingen soń osy sportqa birjola bet burǵanyn atap ótti. 2019 jyldyń mamyr aıynda birinshi ret QR chempıonatyna qatysyp, sodan beri chempıondyq ataqtaryn ala bastaǵan.
Kópbalaly áke qazirgi tańda alǵa qoıǵan maqsattaryna jetý jolynda jattyqtyrýshy Arslan Sýıýnshalıevtiń jetekshiligimen júıeli túrde jattyǵý jasaýda.
— Alda Paralımpıada oıyndaryna joldama utyp alý maqsaty tur. Soǵan daıyndyq ústindemiz, - deıdi parasportshy.
