Sportpen shuǵyldaný kóshege shyǵýǵa negiz bola almaıdy – Ádilet mınıstri

NUR-SULTAN. QazAqparat – QR Ádilet mınıstriligi karantın kezinde kóshege sportpen shuǵyldanýǵa shyǵatyndarǵa qatysty túsinik berdi, dep habarlaıdy QazAqparat tilshisi.

«Osy turǵyda densaýlyq saqtaý mamandarynyń pikirine súıenemiz. Mamandardyń paıymynsha, (ınfektsııa qaýpi kezinde) sportpen shuǵyldanatyn adamǵa da, sondaı-aq onyń janyndaǵy adamdarǵa da joǵary qater týyndaıdy. Sondyqtan sportpen aınalysýdy kóshege shyǵý úshin negiz retinde sanamaý sheshimi qabyldandy. Ǵımarattyń ishinde sportpen shuǵyldaný úshin túrli ádister bar. Osy oraıda bul tásilderdi ýaqytsha paıdalanyp, engizilgen shekteýlerge túsinikpen qaraǵan jón bolar», - dedi Ádilet mınıstri Marat Beketaev Habar 24 telearnasynda ótken onlaın brıfıngte.

Ádilet mınıstrligi ókilderiniń sózine qaraǵanda, azyq-túlikti úıdiń janyndaǵy dúkenderden alýǵa keńes berilgen.

«Eger de qajettilik bolsa, azyq-túlik bazaryna barýǵa bolady. Alaıda saqtyq sharalaryn ustaný kerek, ıaǵnı arnaıy maska men qolǵap bolýy qajet», - dep atalyp ótti brıfıngte.

Budan buryn habarlanǵandaı, QR Ádilet mınıstri Marat Beketaev kúsheıtilgen karantın rejimindegi jańa mindetterge qatysty pikir bildirdi.