Sport jýrnalısteri arasynda baıqaý jarııalandy

ASTANA. QazAqparat - Sport taqyrybyn arqaý etip júrgen Qazaqstannyń BAQ ókilderi arasynda sport jýrnalısi, qoǵam qaıratkeri Seıdahmet Berdiqulovtyń júldesine arnalǵan jyl saıynǵy baıqaý jarııalandy, dep habarlaıdy «QazAqparat» HAA tilshisi.

Baıqaýdy QR Mádenıet jáne sport mınıstrligi Sport jáne dene shynyqtyrý isteri komıteti uıymdastyryp otyr. Júlde sport taqyrybyndaǵy úsh materıaldyń avtoryna beriledi. Onyń ekeýi memlekettik tildiń mártebesin kóterý maqsatynda qazaq tilinde jazylǵan materıal bolsa, biri - orys tilindegi jumys úshin tabystalady. 

Baıqaýǵa usynylatyn jumystardyń basty taqyryptary:

1.  Chempıonattarda, Álem jáne Azııa kýboktarynda, halyqaralyq gran-prıde, «A» kategorııaly týrnırlerde, Qazaqstan birinshilikterinde qazaqstandyq sportshylardyń óner kórsetýleri;

2.  Qazaqstandyq BAQ-tyń buqaralyq, paralımpıadalyq, ulttyq jáne balalar sport túrleri (Paralımpıadalyq jarystar, ulttyq sport túrleri boıynsha festıvaldar, marafondar men aýyldyq oıyndar) týraly materıaldary;

3. Dene shynyqtyrý jáne sport problemalary jáne olardy sheshý joldary týraly maqalalar, materıaldar, ocherkter;

4. Sport taqarybyndaǵy televızııalyq, radıo baǵdarlamalar, derekti fılmder, gazetter nemese jýrnaldarǵa shyqqan maqalalar;

5. Qazaqstan jazýshylarynyń avtorlyq jumystary (kitaptar, sporttyq entsıklopedııalar jáne t.b.).

Baıqaý jeńimpazdary arnaıy dıplompen, «Seıdahmet Berdiqulov baıqaýynyń laýreaty» tósbelgisimen jáne aqshalaı syıaqymen marapattalady. Ótinimder men jumystar Astana qalasy Máńgilik el kóshesi, 8 mekenjaıyndaǵy Sport jáne dene shynyqtyrý isteri komıtetinde 2017 jyldyń 15 jeltoqsanyna deıin qabyldanady. Sonymen qatar, ótinimdi [e-mail] poshtasyna jiberýge bolady.