Sport jarysyna qatysatyn balanyń ata-anasynan aqsha jınaý zańdy ma – vıtse-mınıstr jaýap berdi
Májiliste buqaralyq jáne balalar sportyn damytý máselesine arnalǵan is-shara ótti. Jıynnan keıin Týrızm jáne sport vıtse-mınıstri Serik Jarasbaev jarysqa qatysatyn balanyń ata-anasynan aqsha jınaý qanshalyqty zańdy degen suraqqa jaýap berdi, dep habarlaıdy Kazinform.
«Ondaı aqsha jınaý áreketin bir sózben zańdy nemese zańsyz dep aıta almaımyz. Bul qarajatty jergilikti atqarýshy organdar berip jatyr. Endi onyń balalarǵa jetýin bárimiz birge qamtamasyz etýimiz kerek. Sala mamandarymen qatar Qarjylyq monıtorıng, Qarjy naryǵyn retteý jáne damytý agenttikteri de bul iske atsalysyp jatyr. Ata-analar ár oblystyń jarysqa bóletin qarjysyn bilýi kerek. Uıymdastyrýshylar jarystyń qandaı shyǵyndaryna memleketten aqsha bólingenin ashyq kórsetip, qatysýshylarǵa sol málimetti usynyp otyrýy kerek. Mysaly „naýryz aıynda mynandaı jarys bolady. Ol jarysqa alǵash bolyp tirkelgen 26 adamnyń shyǵynyna aqsha bar“ dep aldyn ala habarlap otyrý qajet. Al qatysýshylar sany 26-dan asyp bara jatsa, olarǵa basqa joldaryn qarastyrý kerek», — dedi ol BAQ ókilderiniń saýalyna bergen jaýabynda.
Vıtse-mınıstr bul máselede basty jaýapkershilik — bapkerdiń moınynda degen paıym aıtty.
«Ata-anadan buryn jarystyń shyǵynyn kim óteıtinin jattyqtyrýshy bilýi kerek. Al ata-ana sol jattyqtyrýshydan surap, talap etedi. Bul jerde ata-ana men jarys uıymdastyrýshynyń arasyndaǵy kópir — jattyqtyrýshylar. Sondyqtan ata-analar búkil máseleni jattyqtyrýshydan surap, bilip otyrýǵa haqyly. Bul jerde negizgi jaýapkershilik osy jattyqtyrýshyda», — dedi Serik Jarasbaev.
