Sport jáne týrızm mınıstri Brazılııanyń fýtbol akademııasyndaǵy oqýlarynan demalysqa kelgen jas fýtbolshylarmen kezdesti
sp;ASTANA. Jeltoqsannyń 3-i. QazAqparat /Marlan Jıembaı/ - Brazılııanyń «Ole Brazıl Klab» fýtbol akademııasynda oqyp jatqan fýtbolshylarymyzdyń ekeýi San-Paola shtatynyń «Ole Brazıl» bas jasóspirimder komandasynyń quramyna qabyldanǵan.
Bul týraly búgin Brazılııadaǵy oqýlarynyń birinshi semestrin aıaqtap, demalysqa elge oralǵan 26 jas fýtbolshylarmen kezdesken Týrızm jáne sport mınıstri Temirhan Dosmuhambetov aıtty, dep habarlaıdy QazAqparat.
Mınıstrdiń aıtýynsha, bul shtatta fýtbol óte jaqsy damyǵan jáne olardyń ulttyq komandasyna qabyldaný óte qıyn. Alaıda óz oıyn órnekterimen erekshelengen Raýan Sarıev pen Berik Shaıhov «Ole Brazıl» komandasynyń quramyna qabyldanǵan. Sonymen qatar bizdiń aıaqdop sheberleriniń komandasy ártúrli týrnırlerdiń jeńimpazy atanyp, San-Paýlo shtatynyń chempıony ataǵyna qol jetkizgen.
«Elbasynyń 83 mıllıon teńge bólýiniń arqasynda osy elde bilim alyp jatqan elimizdiń alǵashqy qarlyǵashysyńdar. Árqaısylaryńnyń 1 jyldyq oqýlaryńa memleket 20 myń dollar bólip otyr», dedi mınıstr.
Memleket basshysy álemdegi tanymal sport túri fýtboldyń elimizde damýyna erekshe kóńil aýdaryp keledi. Degenmen Qazaqstanda osy sport túriniń aqsap turǵany shyndyq. 2007 jyly Brazılııaǵa saparmen barǵan QR Prezıdenti Brazılııa Prezıdentimen fýtbol isin damytýdaǵy yntymaqtastyqqa qol jetkizgen edi. Osyǵan oraı aǵymdaǵy jyly kóktemde fýtbol óneriniń qyr-syryn meńgerýge býyny qataıa qoımaǵan 26 jasóspirim iriktep alynyp, osy sport túriniń otany sanalatyn Brazılııa eliniń «Ole Brazıl Klab» fýtbol akademııasyna tálim alýǵa jiberilgen bolatyn.
