Sport jáne dene shynyqtyrý isteri komıtetiniń burynǵy qyzmetkerleri sottaldy
ShQO Qylmystyq ister jónindegi mamandandyrylǵan aýdanaralyq soty baspasóz qyzmetiniń málimetinshe, iri kólemde para alǵan Sport jáne dene shynyqtyrý isteri komıtetiniń burynǵy basshysy «X», aýyr zardaptarǵa ákep soqqan qyzmet babyn asyra paıdalanǵany úshin komıtet basshysynyń eks-orynbasary «O» jáne JShS-niń alaıaqtyq jasaǵan burynǵy dırektory «B» sottaldy.
«Belgili bolǵandaı, komıtet orynbasary «O» men JShS dırektory «B» aldyn ala sóz baılasyp, 354 112 947 teńge mólsherinde bıýdjet qarajatyn jymqyrǵan. Bul qarjy negizinen Rıdder qalasynda 300 oryndyq respýblıkalyq mamandandyrylǵan olımpıadalyq rezerv mektep-ınternat-kolledjin salýǵa bólingen», - delingen aqparatta.
Al Sport jáne dene shynyqtyrý isteri komıtetiniń eks-basshysy «X» 2018 jyldyń mamyry men jeltoqsan aılary aralyǵynda JShS dırektory «B-dan» 35 013 881 teńge kóleminde para jáne quny 13 000 000 teńgelik avtokólik alǵan. Ol kólikti áıeliniń atyna aýdaryp jibergen.
«Sot isi barysynda «O» jáne «B» óz kinálaryn moıyndady. Al «H» para almaǵanyn alǵa tartqan. Alaıda aıyptalýshylardyń kinási kýágerlerdiń aıtqandarymen jáne tıisti qujattarmen dáleldendi», - delingen habarlamada.
Sot úkimi boıynsha Sport jáne dene shynyqtyrý isteri komıtetiniń burynǵy basshysy «X» QR Qylmystyq Kodeksiniń 366-baby 2-bóligimen 5 jylǵa, komıtet basshysynyń eks-orynbasary «O» QK-niń 361-baby 4-bóliginiń 2-tarmaǵymen 3 jylǵa jáne JShS-niń osyǵan deıin sotty bolǵan burynǵy dırektory «B» 7 jylǵa bas bostandyqtarynan aıyryldy. Sondaı-aq olar memlekettik qyzmette jumys isteý quqyǵyn ómir boıyna joǵaltty. Úkim áli zańdy kúshine engen joq.