Sport jáne dene shynyqtyrý agenttiginiń tóraǵasy 2020 jylǵa deıin 924 sporttyq nysandy salýdy usyndy
ASTANA. 12 naýryz. QazAqparat - 2020 jylǵa deıin respýblıkamyzda 196 mıllıard teńgege 924 dene shynyqtyrý jáne sport keshenderin salý kerek.
Bul málimettermen búgin elimizdiń «Dene shynyqtyrý jáne sport týraly» zańynyń oryndalý barasyna baılanysty Senat depýtattarymen kezdesken Sport jáne dene shynyqtyrý agenttiginiń tóraǵasy Talǵat Ermegııaev tanystyrdy.
Onyń derekterine qaraǵanda, búginde respýblıka qalalarynda dene shynyqtyrý jáne sport keshenderine degen qajettilik 324 birlikti quraıdy. Atalmysh keshenderdi ornatý úshin olardyń árqaısysyna ortasha eseppen alǵanda 290 mıllıon teńge qajet. Al 324 keshenge 94 mıllıard teńge shyǵyndalady.
«Aýdan ortalyqtary men eldi mekenderge qajetti dene shynyqtyrý jáne sport keshenderi 600-di quraıdy. Ondaǵy keshenderdiń bireýiniń qurylysy ortasha eseppen alǵanda 170 mıllıon teńgeni quraıdy dep alatyn bolsaq, barlyq keshendi salýǵa 102 mıllıard teńge qajet. Al respýblıka boıynsha 2020 jylǵa deıin barlyǵy 196 mıllıard teńgege 924 dene shynyqtyrý jáne sport keshenderin salýymyz kerek»,-dedi Agenttik tóraǵasy.
