Sport jáne dene shynyqtyrý agenttigi lotereıaǵa halyqtyń senimin arttyrýdy qolǵa almaq
ASTANA. 28 qazan. QazAqparat - Jekelegen alaıaqtyq oqıǵalar saldarynan lotereıa utysyna halyqtyń senimi tómendep ketken. Jurtshylyqtyń senimin qalpyna keltirý úshin júıeli ári zańnamalyq sharalar qajet etiledi. Búgin Parlament Májilisinde «Lotereıalar jáne lotereıalar qyzmeti týraly» zań jobasynyń tanystyrylymy barysynda Sport jáne dene shynyqtyrý agenttiginiń tóraǵasy Erlan Qojaǵapanov osylaı málim etti.
Agenttik tóraǵasynyń aıtýynsha, qumar oıyndar uıymdastyrýshylardyń lotereıa qyzmetin de jamylyp otyrǵan faktileri kezdesedi. «Elimizdiń árbir óńirlerinde, qalalarda bir sáttik utys oıyndaryn ótkizýge arnalǵan lotereıalyq oıyn avtomattary bar. Bulardyń arnaıy aýmaqqa yǵystyrylǵan qumar oıyndarynyń oıyn avtomattarynan esh aıyrmashylyǵy joq. Bul qyzmet erterekte berilgen lıtsenzııalar arqyly júzege asyrylyp keledi», - deıdi Erlan Qojaǵapanov. Onyń aıtýynsha, lotereıa naryǵynda alaıaqtyqtyń basqa da túrleri kezdesedi. Máselen, keıbir lotereıalyq bıletter qoldan jasalǵan jalǵan bolyp shyqqan. «Bundaı faktiler tutastaı lotereıa naryǵyna senimdi joǵaltyp, jaǵymsyz áser qaldyryp otyr. Al álemdik tájirıbe lotereıany uıymdastyrý men ony ótkizýge múldem basqasha qyrynan kelip otyr», - deıdi agenttik basshysy. Onyń sózine qaraǵanda, lotereıa qyzmeti búgingi kúni zamanaýı telekommýnıkatsııalyq, aqparattyq tehnologııalardy tolyǵymen ózine sińirgen ekonomıkanyń qarqyndy damyp otyrǵan salasy.
«Lotereıa uıymdastyrýdan túsken qarjylardy basqara otyryp, ony áleýmettiń qajetine jumsaýdyń joldary álemdegi damyǵan elderdiń tájirıbesinde aıqyndalǵan. Máselen, bul naryqtan túsken qarajat eń aldymen áleýmettik salany damytýǵa, onyń ishinde sport pen dene shynyqtyrýdy, bilim men ǵylymdy damytýǵa jumsalady. Osynyń ózi lotereıanyń memlekettiń áleýmettik mánge ıe mindetterin sheshýde aıryqsha oryn alyp otyrǵanyn kórsetse kerek», - deıdi Erlan Qojaǵapanov. Agenttik tóraǵasynyń aıtýynsha, lotereıa áleýmettik shyǵystardyń, sporttyq sharalardy júzege asyrýdyń qosymsha kózi bolǵandyqtan, bul naryq birqatar damyǵan elderde memlekettiń monopolııasynda tur. Mysaly, Fınlıandııada sporttyq uıymdarǵa bıýdjetten jumsalatyn shyǵynnyń aıtarlyqtaı bóligi bir júıege biriktirilgen memlekettik lotereıa oıyndaryn uıymdastyrýdan quralady. «Al Ulybrıtanııanyń zańnamasy boıynsha ulttyq lotereıa oıyny dırektsııasy qyzmet etedi, osy uıym lotereıa naryǵyna memlekettik baqylaý fýnktsııasyn júzege asyrady. Atalmysh eldegi lotereıa oıynymen aınalysatyn operator-kompanııa túsken qarjynyń 40 paıyzyn memlekettik bıýdjetke aýdarsa, 50 paıyzy syıaqy qory, al 20 paıyzy operatsııalyq shyǵyndar bolyp tabylady. Lotereıa naryǵynan bıýdjetke aýdarylǵan qarajat arqasynda brıtandyqtar mádenıet pen sporttyń aıqyn qoldaýyna ıe boldy. Máselen, Londonda Olımpıada oıyndaryn ótkizýge jumsalǵan shyǵyndardyń aýqymdy bóligin lotereıa oıyndaryn uıymdastyrýdan túsken qarajat quraǵan bolatyn. Budan bólek, Ulybrıtanııanyń fýtbol qaýymdastyǵy ulttyq lotereıadan aýdarylǵan 100 mln. fýntqa áıgili «Ýemblı» stadıonyn jóndeýden ótkizgen», - deıdi agenttik basshysy. Onyń aıtýynsha, 2012 jyldyń kúzinen Ýkraına da lotereıa naryǵyna memlekettik monopolııa engizip, bul baǵytta tek memlekettik lıtsenzııasy bar ulttyq operatorlar ǵana jumys jasaıtyn bolǵan.
