Sport úıirmeleriniń bıýdjetin biryńǵaı Oqý-aǵartý mınıstrligine bergen jón - Ashat Aımaǵambetov

Májilistiń áleýmettik-mádenı damý komıtetiniń tóraǵasy Ashat Aımaǵambetov sport úıirmeleriniń bıýdjetin biryńǵaı Oqý-aǵartý mınıstrliginiń quzyryna berýdi usyndy, dep habarlaıdy Kazinform.

«Bizdiń aıtyp otyrǵanymyz – birizdilik kerek. Óıtkeni árbir memlekettik organnyń óz tapsyrysy bar. Mysaly, Oqý-aǵartý mınıstrliginde de, dál osyndaı (Týrızm jáne sport mınıstrligindegideı – red.) úıirmeler baǵytyndaǵy sporttyq tapsyrys bar. Sonda bizde statıstıka boıynsha da, jalpy bylaı da qaıtalanyp jatady. Ár mınıstrlik óziniń tapsyrysyn bermeı, búkil qarajatty bir mınıstrlikke bekitý kerek. Onyń bári mektepte oqyp jatqan balalar ǵoı. Sol vaýcherlerdi, kýpondardy, memlekettik tapsyrysty birizdendirý máselesin kóterip otyrmyz», - dedi depýtat.

Aıtýynsha, atalǵan usynys Úkimetten Parlamentke kelip túsetin zań jobasynda kórinis tabýy múmkin.

«Árıne, sheshim qabyldaıtyn úkimet. Sondyqtan úkimet bul máselege bir núktesin qoıady dep oılaımyz. Qazir zań jobasy Úkimetten bizge kele jatyr. Sol qujat kelgennen keıin ishine qandaı normalar engizgenin qaraımyz. Sodan keıin baryp bul máseleni birge talqylap, naqty sheshim qabyldaımyz. Bul jerde sport úıirmelerin ǵana aıtyp otyrmyn. Qalǵan úıirmeler qazir Oqý-aǵartý mınıstrliginiń quzyrynda. Al sportqa eki birdeı mınıstrlik qarajat bólip otyr. Sondyqtan qaıtalaý bolyp jatyr», - dedi Ashat Aımaǵambetov.