Sport týraly jańa zań 2013 jyly qabyldanady
ASTANA. 10 maýsym. QazAqparat - "Dene shynyqtyrý jáne sport týraly" zań 2013 jyldyń sońyna deıin qabyldanady. Bul týraly búgin atalǵan zań jobasyn talqylaýǵa arnalǵan konferentsııada QR Sport jáne dene shynyqtyrý isteri agenttigi tóraǵasynyń orynbasary Elsııar Qanaǵatov málim etti.
"Jospar boıynsha, biz zań jobasyn shilde aıynda úkimetke joldaýymyz kerek. Sonan keıin zań Májiliste qaralyp, bıyl zańdy qabyldaýymyz qajet", - dedi E.Qanaǵatov.
"Bul zańnyń eń ózekti tusy buqaralyq sportty damytýǵa qatysty. Orta mektepterde, eńbek ujymdarynda sportqa degen kózqaras túbegeıli ózgerýi kerek. Árbir eńbek ujymynyń basshylyǵy qyzmetkerlerdiń sportpen aınalysýyna qajetti barlyq jaǵdaılardy jasaýy tıis", - dep atap kórsetti E.Qanaǵatov.
Onyń aıtýynsha, zań jobasy sport salasyn joǵary deńgeıge kóterip qana qoımaı, sportshylardyń áleýmettik qamtamasyz etilýine kepil beretin sapaly zań bolýy qajet.
"Sonymen qatar zań jobasy sporttyq ınfraqurylymdardy damytý, mamandardy daıarlaý syndy máselelerdi qamtyp otyr. Joǵary sanatty bizdiń sport tolaǵaılarymyzdy jáne keremet bapkerler men jattyqtyrýshylarymyzdy áleýmettik qorǵaý máselesine úlken kóńil bólinýde. Olar sporttyq jarystardaǵy nátıjeden keıin belgili bir áleýmettik kepildendirilýi shart. Osynyń barlyǵy bizdiń zańnamada kórinis tabatyn bolady", - dedi ol.
