Sport týraly jańa redaktsııadaǵy zań jobasy dopıng jónindegi bappen tolyqty
ASTANA. 11 qarasha. QazAqparat - Jańa redaktsııadaǵy «Dene shynyqtyrý jáne sport týraly» zań jobasynda dopıngpen kúres jónindegi arnaıy bap qosyldy. Bul týraly búgin Parlament Májilisinde qujattyń tanystyrylymy barysynda málim boldy.
Sport jáne dene shynyqtyrý isteri agenttiginiń tóraǵasy Erlan Qojaǵapanovtyń aıtýyna, qaraǵanda búginde sportqa qatysy bar búkil álem elderi de, sport qaýymdastyǵy da dopıng paıdalanady.
«Bizdiń el de odan shet qala almaı otyr. Sportshylardyń dopıng paıdalanǵan faktileri bar. Dopıngpen kúreste biz halyqaralyq kelisimderdi nazarǵa alamyz. Sondyqtan da, jańa zań jobasynda dopıngpen kúreske arnalǵan arnaıy 46-y bap engizilip otyr. Bap tutastaı dopıngpen kúres salasyndaǵy máselelerge arnalǵan», - dedi agenttik tóraǵasy.
Onyń aıtýynsha, qazaqstandyq sportshylardy dopıngti paıdalanǵany úshin aıyptaý nemese jazalaý negizinen halyqaralyq jáne ulttyq federatsııalarǵa júkteledi.
