Sport týraly jańa zańda ne ózgerdi

ASTANA. KAZINFORM – Búgin Prezıdent dene shynyqtyrý jáne sport salasyndaǵy jańa zańǵa qol qoıdy. Bul tek kásibı sportshylarǵa ǵana emes, balasyn sportqa berip júrgen ata-analarǵa, salaýatty ómir saltyn ustanatyn barsha azamattarǵa qatysty mańyzdy qujat.

Parlament Májilisiniń depýtaty, Áleýmettik-mádenı damý komıtetiniń tóraǵasy Ashat Aımaǵambetov jańa zańnyń basty jańashyldyqtary týraly aıtyp berdi.

− Bizdiń komıtet depýtattary osy zań jobasymen uzaq ári muqııat jumys istedi. Nátıjesinde legıonerlerdi qarjylandyrýǵa bıýdjetten de, kvazımemlekettik sektordan da (mysaly, «Samuryq-Qazyna») tyıym salynady. Qarajat óz sportshylarymyzdy qoldaýǵa jumsalady. Ulttyq sport túrleri (qazaqsha kúres, asyq atý, kókpar jáne t.b.) basym baǵyttar tizimine resmı túrde endi. Buqaralyq sport — negizgi basymdyq bolady, − dep jazdy depýtat óziniń Telegram-paraqshasynda.

Sport salasynda vertıkal basqarý júıesi engiziledi — endi mınıstrlikten ákimdikke deıin bári bir júıemen jumys isteýi kerek. Sport federatsııalary respýblıkalyq qurylymmen baılanysty bolýy kerek, bul tártip pen tıimdilik úshin qajet.

− Sport mekemeleriniń basshylary endi rotatsııa arqyly taǵaıyndalady — «máńgilik» bastyqtar bolmaıdy. Mundaı júıe mektep dırektorlaryna qatysty da engizilgen. Múgedektigi bar sportshyǵa erip júretin adamnyń shyǵyny memleket esebinen óteledi. Bul da bizdiń depýtattardyń bastamasy, − deıdi A. Aımaǵambetov.

Sonymen birge, ár sport túri boıynsha jas shekteýleri naqty belgilendi, bul balalardyń qaýipsizdigi úshin mańyzdy. Antıdopıng erejelerin buzǵandarǵa qatysty jaýapkershilik kúsheıtiledi. Sporttyq medıtsınanyń jumysy naqty zańmen retteldi.

Bıýdjet endi naqty basym sport túrlerine baǵyttalady. Sport uıymdaryna aqyly qyzmet kórsetip, tabys tabýǵa múmkindik beriledi — bul qarajat sol uıymnyń esebine túsedi.

Buǵan deıin Týrızm jáne sport mınıstriniń orynbasary Serik Jarasbaev sport salasyn reformalaý sharalary týraly aıtyp bergen edi.