Sport saraılary kommertsııalyq paıdadan góri ulttyń saýlyǵy úshin paıdalanylýy tıis - J. Ahmetbekov
ASTANA. 6 aqpan. QazAqparat - Sport saraılary kommertsııalyq paıdadan góri ulttyń, bolashaq urpaqtyń deniniń saýlyǵy úshin paıdalanylýy tıis. Búgin Parlament Májilisiniń jalpy otyrysynda Úkimet basshysynyń atyna saýal joldaǵan depýtat Jambyl Ahmetbekov osylaı málim etti.
«Elbasy N.Á.Nazarbaevtyń halyqqa joldaǵan joldaýynda halyqtyń densaýlyǵynyń kepili buqaralyq sportty damytýǵa basa mán berildi. Elbasy buqaralyq sportqa halyqtyń keminde 30 paıyzy tartylýy tıis dep tikeleı mindet qoıdy. Jasóspirimder men balalardy sportqa tartý osy uly mindetti júzege asyrýdaǵy júıelerdiń bireýi ǵana. Bul urpaǵymyzdyń saýlyǵynyń kepili, ult densaýlyǵyn saqtaý jolyndaǵy amaldarynyń biri. Memleket salaýatty ómir saltyn ustaýǵa jol kórsetip qana qoımaýy tıis, soǵan barlyq jaǵdaıdy jasaýy kerek», - deıdi depýtat J. Ahmetbekov. Alaıda, onyń aıtýynsha, elimizde sporttyq ǵımarattardy paıdalaný isinde bul múmkin bolmaı otyr. «Búgingi kúnniń aşy da bolsa shyndyǵy sol, sport ǵımarattarynyń esigi qazir sportpen shuǵyldanamyn degen jastar úshin jabyq, dálirek aıtsaq jaldaý aqysy tym qymbat. Mysaly, Balýan Sholaq atyndaǵy sport saraıynyń muz aıdynynyń bir saǵattyq jaldaý aqysy saǵatyna 60 myń teńge. Buqaralyq sportty aıtpaǵanda sportpen turaqty aınalysatyn sportshylar, jattyqtyrýshylar sport zaldaryna jaqyndaı almaı júr. Sport zaldarynyń buqara halyqqa qoljetimdi bolmaýy buqaralyq sportty damytýǵa eń basty qol baılaý, eń basty kedergi bolyp otyr», - deıdi ol. Osyǵan oraı, J. Ahmetbekov sport saraılary halyqtyń, ıaǵnı salyq tóleýshiniń aqshasyna salynǵanyn, onyń tikeleı mindeti halyqtyń sportpen, dene shynyqtyrýmen aınalysýyna paıdalanylýǵa tıis ekendigin atap ótti. «Osy saladaǵy qazirgi saıasatty túbirimen qaıta qaraýymyz qajet. Memleket sport saraılaryn kommertsııalyq paıdadan góri ulttyń, bolashaq urpaqtyń deniniń saýlyǵy úshin paıdalanýy tıis», - degen depýtat birqatar usynystaryn jarııalady.
