Sport salasynyń damýyna úles qosý men úshin úlken mártebe - Álemgúl Sabyrhan

KÓKShETAÝ. QazAqparat - Búgingi jahandaný kezeńinde áıelder adamzat urpaǵyn jalǵastyrýshy ǵana emes, qoǵamdyq-saıası, áleýmettik-ekonomıkalyq úderisterdiń qozǵaýshy kúshine aınalyp otyr. Názik jandylardyń atqarýshy bılikte jemisti eńbek etip qana qoımaı, qandaı qyzmette bolsyn abyroı men tabys bıiginen kórine otyryp, ýaqyt kóshinen qalmaı, bilim berý, densaýlyq saqtaý, mádenıet pen óner, sport salalarynda damýyna zor úles qosyp keledi. Osyndaı arýlarymyzdyń biri – esimi qazir sportsúıer qaýymǵa jaqsy tanys, kıokýshınkaı-kan karateden halyqaralyq deńgeıdegi sport sheberi, aqmolalyq arý Álemgúl Sabyrhan der edik.

Álemgúl sporttyq mansabyn 8 jastan bastady. Sodan beri 15 jyl ishinde ol respýblıkalyq, halyqaralyq jarystarǵa qatysyp, júldeli oryndardan kórinip keledi. Segiz dúrkin Qazaqstan chempıony, segiz márte halyqaralyq týrnırlerdiń jeńimpazy atandy, 2015–2016 jyldary Álem jáne Azııa chempıonatynda júldeli oryndardan kórindi. Al, byltyrǵy jyly Nur-Sultan qalasynda ótken álem chempıonatynda jeńis tuǵyryna kóterilip, aıdy aspanǵa shyǵardy. Bul jolǵy jarysta sportshylar jeńis úshin janyn salyp baqty. Álemgúldiń qarsylastary talaı jarystarda top jarǵan kil myqtylar boldy. Degenmen, olardyń ataq-dańqy, burynǵy jeńisteri jas karateshiniń boıyna úreı uıalata qoıǵan joq.

Qyzdardyń kúres, karate, aýyr atletıka, boks sııaqty úlken kúshti qajet etetin sport túrlerimen aınalysýy búginde eshkimniń tańdanysyn týdyrmaıdy. Sodan bolar, onyń kıokýshınkaı-kan karatemen aınalysqanyna týǵan-týystary da qarsy bola qoımaǵan. Sportshynyń álem chempıonyna deıingi joly birden jáne kezdeısoq samǵaý arqyly emes, satylap ósýmen jáne kóp ter tóge otyryp jattyǵýdyń arqasynda keldi. Ol bul tabysqa jetýde óziniń bapkeri, halyqaralyq dárejedegi sport sheberi Azamat Tákenovtiń sińirgen eńbeginiń zor ekendigin eshqashan umytpaıdy. Bilikti jattyqtyrýshysynyń tálimimen sporttaǵy bıikterdi baǵyndyryp keledi.

«Keıingi kezderi halyqaralyq dúbirli dodalarda sportshy qyzdarymyz tepse temir úzetin jigitterimizden qalyspaı, elimizdiń abyroıyn asqaqtatyp, senim údesinen shyǵyp júr. Baıraqty jarystarda elimizdiń kók týyn jelbiretip, sport salasynyń damýyna úles qosý men úshin úlken mártebe. Sondyqtan, karateshi bolǵanyma esh ýaqytta ókinbeımin. Qazir meniń de jolymdy qýǵan sińilerim bar», - deıdi Álemgúl Sabyrhan.

Búgingi kúni jasyndaı jarqyrap, bıikke umtylǵan talantty sportshyny alda áli de talaı dúbirli jarystar kútip tur.