Sport salasyndaǵy mamandardyń sanyn arttyrý kózdelip otyr - mınıstr

NUR-SULTAN. QazAqparat – QR Mádenıet jáne sport mınıstri Aqtoty Raıymqulova elimizdegi mektepterdegi sport zaldarynyń keńinen paıdalaný qadamdary týraly aıtty, dep habarlaıdy QazAqparat tilshisi.

«Keshendi josparda óńirlik sport basqarmalary men bilim berý basqarmalary halyqtyń barlyq jas sanattarynyń sport sektsııalaryna qatysý múmkindigin kózdep, jalpy bilim beretin mektepterdiń sport zaldaryna qoljetimdilikti qamtamasyz etý jóninde memorandýmdar jasaý eskerilgen. Búginde elimizde sport zaldary 5 428 jalpy bilim beretin mektepte bar. Eń tómengi esepteýler boıynsha usynylǵan sport zaldarynda 20-ǵa jýyq adam, ortasha eseppen 1,5 saǵattan qosymsha shuǵyldana alady. Bul jalpy alǵanda 100 myńnan astam adamdy quraıdy», - dedi mınıstr Ortalyq kommýnıkatsııalar qyzmetindegi onlaın baspasóz máslıhatynda.

Onyń sózine qaraǵanda, josparda halyqpen jumys isteý úshin sport boıynsha nusqaýshylardyń sanyn arttyrý kózdelip otyr. Búgingi tańda aýyldyq jerlerde 1 345 mamanǵa qajettilik bar. Bul shara ásirese aýyldyq jerlerde jańa jumys oryndaryn qurýǵa múmkindik beredi.

«Osy sharany iske asyrý nátıjesinde - 600 myńǵa jýyq adam dene shynyqtyrýmen jáne sportpen aınalysýǵa tartylady», - dedi Aqtoty Raıymqulova.

Aıta keteıik, Dene shynyqtyrý jáne buqaralyq sportty damytý jónindegi 2020-2025 jylǵa arnalǵan keshendi jospary ázirlendi. Bul josparda múddeli memlekettik organdardyń, jergilikti atqarýshy organdardyń usynystary tolyq eskerilip, QR Premer-Mınıstrimen bekitildi.