Sport salasyn órkendetýge metsenattardyń áleýetin paıdalaný qajet – Prezıdent
«Qazir salaýatty ómir saltyn nasıhattap, buqaralyq sportty damytý aıryqsha mańyzdy. Ásirese, balalardyń sportpen aınalysýyna jaǵdaı jasaý qajet. Munyń bári halyqtyń densaýlyǵyn jaqsartýǵa múmkindik beredi. Men bul másele jóninde Joldaýymda aıttym. Memleket sport ınfraqurylymyn jetildirýge kóp kóńil bóledi. Elimizde 43 myńnan astam sport ǵımaraty bar. Olardyń jartysynan kóbi aýyldyq jerde ornalasqan. Biraq, qarapaıym jáne qoljetimdi nysandar áli de az. Sport ǵımarattarynyń basym bóligi memleket menshiginde. Olardy kútip ustaýǵa bıýdjetten qomaqty qarjy bólinedi», - dedi Qasym-Jomart Toqaev.
Prezıdenttiń aıtýynsha, sport salasyn órkendetýge jergilikti ózin-ózi basqarý organdarynyń, metsenattardyń jáne jarnama berýshilerdiń áleýetin paıdalaný qajet.
«Sondaı-aq, memlekettik-jekemenshik áriptestik tásilin keńinen qoldaný kerek. Buqaralyq sportty damytýǵa turǵyndardyń ynta bildirip, belsendi atsalysýy mańyzdy. Memleket buǵan barlyq jaǵdaıdy jasaýǵa tıis», - dedi Memleket basshysy.
Qasym-Jomart Toqaevtyń sózine qaraǵanda, buqaralyq sportty damytýǵa, salaýatty ómir saltyn nasıhattaýǵa úles qosyp júrgen kásipkerler men basqa da azamattar joǵary memlekettik nagradalarmen marapattalady.
«Jalpy, bul saladaǵy jumysta kózboıaýshylyq pen ámirshildik-ákimshildik tásilden bas tartý qajet. Úkimet pen ákimdikter tıisti baǵdarlama ázirlep, sheshim qabyldaǵan kezde osynyń bárin eskerýi tıis», - dedi Prezıdent.