Sport salasyndaǵy jemqorlyqtan memleketke 800 mln teńge zalal keldi
ASTANA. KAZINFORM – Jyl basynan beri Sybaılas jemqorlyqqa qarsy qyzmet sport salasyndaǵy sybaılas jemqorlyqqa baılanysty 18 qylmystyq is júrgizdi. Aıaqtalǵan ister boıynsha 800 mln teńgeden astam jalpy zalal anyqtaldy.
Bul tergeýler birqatar sybaılas jemqorlyq shemalaryn ashty, sonyń ishinde jalǵan oqý-jattyǵý jıyndaryn ótkizý, jalaqy tóleý kezinde aıla-sharǵy jasaý, qymbat turatyn sporttyq jabdyqtar satyp alýlar bar.
Antıkordyń habarlaýynsha, Týrızm jáne sport mınıstrligi Sport jáne dene shynyqtyrý isteri komıtetiniń «Sportty damytý dırektsııasy» RMQK dırektory men onyń orynbasaryna qatysty tergeý aıaqtaldy. Olardyń 2022-2023 jyldary kásipkerlik sýbektisimen aldyn ala sóz baılasý boıynsha sporttyq jabdyqtar alýǵa bólingen 397 mln teńge bıýdjet qarajatyn jymqyrǵany anyqtaldy. Oǵan qosa, 2021 jyly «Dat Corporation» JShS dırektory retinde Batys Qazaqstan oblysynda fýtbol men dopty hokkeıdi damytýǵa bólingen 161 mln teńge bıýdjet qarajatyn jymqyrǵan. Qazirgi ýaqytta is sotta qaralyp jatyr.
Sonymen birge, Qaraǵandy qalasynyń Qazybek bı aýdandyq soty «Jastar» olımpıadalyq rezerviniń oblystyq mamandandyrylǵan balalar-jasóspirimder mektebiniń fýtboldan basshysy B. Nurlanovqa úkim shyǵardy. Ol jalǵan oqý-jattyǵý jıyndaryn tirkep, 3 mln teńgeden astam bıýdjet qarajatyn jymqyrǵany úshin kináli dep tanyldy. B. Nurlanov memlekettik qyzmette, sotta jáne jergilikti ózin-ózi basqarý organdarynda qyzmet atqarý quqyǵynan jáne 2 jylǵa bas bostandyǵynan aıyryldy.
Almaty qalasy boıynsha Sybaılas jemqorlyqqa qarsy qyzmet Almaty oblysy Dene shynyqtyrý jáne sport basqarmasynyń burynǵy basshysyn jemqorlyqpen ustady. Ol olımpıadalyq rezervtiń respýblıkalyq mamandandyrylǵan mektep-ınternatynyń dırektory qyzmetinde azyq-túlik jetkizý qyzmetterin memlekettik satyp alý shartyn jasasqany úshin jeke kásipkerden 8 mln teńge para aldy dep kúdiktenedi. Bıyl 24 sáýirde kúdikti sot sanktsııasymen qamaýǵa alyndy. Tergeý jalǵasýda.
Aıta keteıik, elimizde sybaılas jemqorlyqtan tárkilengen aqshaǵa 89 mektep salynyp jatyr.