Sport salasyndaǵy jemqorlyq táýekelderge taldaý júrgizilip jatyr – Antıkor
Sybaılas jemqorlyqqa qarsy is-qımyl agenttigi sport salasyndaǵy jemqorlyq táýekelderge syrtqy taldaý júrgizip jatyr. Bul týraly atalǵan agenttiktiń resmı ókili Arman Tileýkenov aıtty, dep habarlaıdy Kazinform.
«Taldaý aıasynda Týrızm jáne sport mınıstrliginiń, onyń vedomstvolyq baǵynysty uıymdarynyń sportty qarjylandyrý máseleleri jónindegi qyzmetine taldaý júrgizilýde. Budan basqa, sporttyq is-sharalar men jıyndar, jabdyqtar men sporttyq taǵamdy satyp alý, sheteldik is-saparlardy uıymdastyrý, syıaqylar, sport obektilerin salý, sondaı-aq sport federatsııalary men kásibı klýbtardy ustaý boıynsha bıýdjettik jáne bıýdjetten tys qarjy kózderi zerdelenetin bolady», - dedi ol vedomstvoda ótken brıfıngide.
Onyń atap ótýinshe, taldaý agenttik, múddeli memlekettik organdar qyzmetkerleriniń jáne azamattyq qoǵam ókilderiniń qatysýymen ótkizilip jatyr.
«Sybaılas jemqorlyqqa qarsy qyzmet azamattardy taldaý júrgizýge qatysýǵa shaqyrady. Eger jemqorlyq táýekelderi týraly aqparatyńyz nemese sportty qarjylandyrý salasyn jetildirý boıynsha usynystaryńyz bolsa, onda olardy karipova.a@antikor.gov.kz elektrondyq poshtasyna jiberýińizdi suraımyz», - dedi Arman Tileýkenov.
