Sport salasyndaǵy 13 laýazymdy tulǵa jaýapqa tartyldy
ASTANA. KAZINFORM – Qazaqstan Joǵary aýdıtorlyq palatasynyń memlekettik aýdıti joǵary jetistikter sporty, sport rezervin daıarlaý jáne bıýdjet qarajatyn paıdalaný salasynda birqatar júıeli kemshilikti anyqtady.
Sportshylardy tárbıeleý men daıarlaýǵa, onyń ishinde joǵary jetistikter sportyna bólingen bıýdjet qarajatynyń tıimdi paıdalanylýyna júrgizilgen aýdıt 2025 jylǵy 8 qańtar men 28 sáýir aralyǵynda ótti. Tekserý 2021 jylǵy 1 qyrkúıek pen 2024 jylǵy 31 jeltoqsan aralyǵyn qamtydy.
Joǵary aýdıtorlyq palatanyń málimetinshe, aýdıt dene shynyqtyrý jáne sport salasyndaǵy baǵdarlamalyq qujattardy iske asyrýda keshendi tásildiń joq ekenin kórsetti.
– Memlekettik aýdıt barysynda joǵary jetistikter sportyn damytýǵa, sport rezervin daıarlaýǵa, sondaı-aq sportshylardy ǵylymı jáne medıtsınalyq turǵydan súıemeldeýge baǵyttalǵan birqatar is-sharanyń oryndalmaǵany nemese tolyq júzege aspaǵany anyqtaldy, – delingen Joǵary aýdıtorlyq palatanyń jaýabynda.
Aýdıt nátıjesi qoldanystaǵy strategııalyq qujattardyń qoıylǵan maqsattarǵa tolyq qol jetkizýdi qamtamasyz ete almaı otyrǵanyn kórsetti. Sonymen qatar jekelegen iske asyrý josparlarynda sport salasyn damytýdyń barlyq baǵyty qamtylmaǵan.
Budan bólek, qoldanystaǵy maqsatty ındıkatorlar júıesi de memlekettik saıasattyń tıimdiligin jan-jaqty baǵalaýǵa múmkindik bermeıdi. Óıtkeni onda joǵary jetistikter sportynyń damý deńgeıin aıqyndaıtyn birqatar mańyzdy kórsetkish eskerilmegen.
Tekserý qorytyndysy boıynsha Týrızm jáne sport mınıstrligine:
· normatıvtik quqyqtyq retteýdegi olqylyqtardy joıý;
· olımpıadalyq rezervtiń mektep-ınternat-kolledjderiniń mártebesine qatysty zańnama normalaryn ózara sáıkestendirý;
· sportshylardy sporttyq qural-jabdyqpen, kıim-keshekpen, tamaqpen jáne medıtsınalyq preparattarmen qamtamasyz etý normatıvterin ázirleý;
· sportshylar men jattyqtyrýshylardy ómir boıy materıaldyq qamtamasyz etý tártibin jetildirý;
· normatıvtik quqyqtyq aktilerdi qoldanystaǵy zańnamaǵa sáıkestendirý;
· sport rezervin daıarlaý, qarjylandyrý jáne sport salasyn basqarý júıesin jetildirý;
· ashyqtyq pen eseptilikti kúsheıtetin qosymsha tetikter engizý;
· qarjylyq tártip buzýshylyqtardy joıý jáne bıýdjetke qaıtarylýǵa tıis qarajattyń ótelýin qamtamasyz etý;
· zań buzýshylyqtarǵa jol bergen laýazymdy tulǵalardy jaýapkershilikke tartý tapsyryldy.
– Memlekettik aýdıt qorytyndysy boıynsha 13 laýazymdy tulǵa tártiptik jaýapkershilikke tartyldy. Sondaı-aq 13 materıal boıynsha Qazaqstan Respýblıkasynyń zańnamasyna sáıkes ákimshilik jaýapkershilik sharalary qoldanyldy, – dep habarlady Joǵary aýdıtorlyq palata.
Sonymen qatar Joǵary aýdıtorlyq palata ulttyq qurama komandalardy ustaýǵa, kásibı sportty qarjylandyrýǵa, sport nysandaryn salý men qaıta jańǵyrtýǵa, buqaralyq sportty damytýǵa jáne Qazaqstan aýmaǵynda halyqaralyq jarystar ótkizýge bólingen bıýdjet qarajatynyń tıimdiligine jeke baǵalaý júrgizilmegenin málimdedi.
Sondaı-aq Týrızm jáne sport mınıstrligi men oǵan qarasty uıymdar 2026 jylǵa arnalǵan memlekettik aýdıt josparyna engizilmegen.
Joǵary aýdıtorlyq palatanyń málimetinshe, aýdıt qorytyndysynda berilgen barlyq tapsyrmany oryndaýdyń naqty merzimderi belgilengen. Qajetti is-sharalardyń kólemi men sıpatyna qaraı olardyń basym bóligi 2025 jylǵy 1 tamyz ben 2026 jylǵy 1 shilde aralyǵynda oryndalýǵa tıis.
Aıta keteıik, buǵan deıin Týrızm jáne sport mınıstrligi Qysqy Paralımpıada oıyndarynyń júldegerleri men olardyń jattyqtyrýshylaryna 388 mln teńgeden astam syıaqy tólegen bolatyn.
