Sport salasynda jalǵan dıplommen nápaqy taýyp júrgen 260-tan astam adam anyqtaldy

ASTANA. KAZINFORM – Jyl basynan elimizde sportty qarjylandyrý salasynda 64 qylmystyq is tirkelip, 23 adam sottaldy. Bul týraly Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov málim etti.

«Agenttik Týrızm jáne sport mınıstrligimen birlesip, sportty qarjylandyrý salasyndaǵy jemqorlyq táýekelderine syrtqy taldaý júrgizdi. Ortalyq deńgeıde taldaý Týrızm jáne sport mınıstrliginiń qyzmetinde, oblystyq sport jáne dene shynyqtyrý basqarmalarynda óńirlik deńgeıde júrgizildi. Taldaý arqyly memlekettik qarajattyń tıimsiz jumsalýyna yqpal etetin eleýli jemqorlyq táýekelderi belgili boldy. 16 óńirde eńbekaqy tóleý qory, is-sapar shyǵyndary, jalǵan sporttyq is-sharalar jáne basqalary boıynsha bıýdjet qarajatyn jymqyrý belgileri bar faktiler anyqtaldy», — dedi ol.

Resmı ókildiń dereginshe, jyl basynan beri atalǵan salada, onyń ishinde osy faktiler boıynsha 64 qylmys tirkeldi. Memleketke keltirilgen zalal 1,6 mlrd teńgeni qurady. 

«Búginde 23 adam sottaldy, 548 mln teńge quraıtyn múliktiń orny óteldi jáne tyıym salyndy. 17 óńirde jattyqtyrýshylyq-oqytýshylyq jáne sporttyq qyzmetti júzege asyrǵan tulǵalardyń jalǵan dıplomdardy paıdalanýynyń 260-tan astam faktisi anyqtaldy. Barlyq materıaldar polıtsııa organdaryna berildi. 188 adammen eńbek sharttary buzyldy», - dedi Danııar Bıgaıdarov.

Eske sala keteıik, buǵan deıin Atyraý oblysynda 30 jattyqtyrýshy jalǵan dıplommen jumys istep kelgenin jazǵan bolatynbyz.

Búgin sondaı-aq, Shymkent qalasynyń sanıtarııalyq-epıdemıologııalyq baqylaý departamentiniń basshysy sottalǵany belgili boldy.