Sport salasynda vertıkaldy basqarý júıesi engizildi – vıtse-mınıstr

ASTANA. KAZINFORM – QR Týrızm jáne sport vıtse-mınıstri Serik Jarasbaev «Dene shynyqtyrý jáne sport týraly» zań aıasynda óńirlik sport basqarmalarynyń basshylary endi Týrızm jáne sport mınıstrliginiń janyndaǵy arnaıy komıssııanyń kelisimimen bekitiletinin málimdedi. 

– Qazirgi tańda 13 oblystyń sport basqarmasyna jańa basshy bekitildi. Sonymen qatar 27 sport federatsııasynda qaıta saılaý ótip, 10 sport túri boıynsha bas jattyqtyrýshy jańadan taǵaıyndaldy, - dedi spıker.

Vıtse-mınıstr Qazaqstan Respýblıkasynyń azamattyǵy joq sportshylardy bıýdjettik qarjylandyrýǵa zań júzinde tyıym salynǵanyn aıtty.

– Budan bylaı kásibı klýbtar sheteldik sportshylardy tájirıbe arttyrý nemese klýb áleýetin kóterý maqsatynda shaqyrǵan jaǵdaıda memlekettik bıýdjetten qarjylandyrý qarastyrylmaıdy. Memlekettik qarjy tek otandyq sportshylardy damytýǵa baǵyttalady, - dedi Serik Jarasbaev.

Sonymen qatar buqaralyq jáne jastar sportyn damytý úshin bıýdjet resýrstaryn qaıta bólý úrdisi eskerile otyryp, kásibı sport klýbtaryn qarjylandyrýdyń shekti deńgeıi belgilenedi. Bul shekteý aılyq eseptik kórsetkishtiń (AEK) belgilengen máni negizinde jasalady.

Buǵan deıin Qazaqstan sportynda basym baǵyttar belgilengenin jazǵanbyz. 

Sonymen qatar Sheteldik sportshylardy bıýdjetten qarjylandyrýǵa tyıym salynatyny jaıly habarlaǵan edik.