Sport salasynda únemdelgen qarajattyń biraz bóligi balalardy damytýǵa baǵyttalady
ASTANA. KAZINFORM – QR Týrızm jáne sport vıtse-mınıstri Serik Jarasbaev jańa ereje aıasynda fýtbol klýbtarynan únemdelgen qarajat balalar sportyna baǵyttalatynyn aıtty.

— Bizdiń oıymyzsha, fýtbol klýbtaryna lımıt pen shekteýli jalaqyny belgileý nátıjesinde únemdeletin qarajat birinshi kezekte balalar men jasóspirimder sportyn damytýǵa baǵyttalady, — dedi S. Jarasbaev Senatta tilshiler suraǵyna jaýap bere otyryp.
Klýbtardy qarjylandyrýǵa lımıt belgileý máselesi qazirgi kezde Sport mınıstrligi janyndaǵy jumys tobynda qaralyp jatyr.
— Zań jobasyn qabyldaý reglamentine sáıkes, zańǵa qol qoıylǵannan keıin 2 aıdyń ishinde biz normatıvtik-quqyqtyq aktilerdi ázirleýimiz kerek. Olardyń negizderi daıyn, biz olardy barlyq federatsııalarmen talqylap jatyrmyz. Túrli usynystar bar, — dedi vıtse-mınıstr.
Budan buryn habarlanǵandaı, Senat «Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Zańyn maquldady.
Onyń aıasynda Qazaqstan Respýblıkasynyń azamattary sanalmaıtyn sportshylardy bıýdjet qarajaty esebinen qarjylandyrýǵa tyıym salyndy.