Sport salasynda tikeleı biriktirilgen basqarý júıesi engizilmek
ASTANA. KAZINFORM — Aldaǵy ýaqytta memlekettik bıýdjetten qarjylandyrylatyn sport túrleri «negizgi», «medaldyq» jáne «ulttyq» bolyp úsh sanatqa bólinedi. Bul týraly Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«Qazaqstan halqyna Joldaýynda jáne 2024 jylǵy 27 tamyzda Olımpıada oıyndarynyń júldegerlerimen kezdesý kezinde Memleket basshysy bergen tapsyrmalarǵa sáıkes Úkimet sportty damytý boıynsha birneshe júıeli sharalardy asyrýdy qolǵa aldy. Qazirgi tańda zań jobasy („Qazaqstan Respýblıkasynyń keıbir zańnamalyq aktilerine dene shynyqtyrý jáne sport máseleleri boıynsha ózgerister men tolyqtyrýlar engizý, sondaı-aq normalardyń artyq (shamadan tys) zańnamalyq reglamenttelýin boldyrmaý týraly“ zań jobasy) ázirlendi. Zań jobasy memlekettik bıýdjetten qarjylandyrylatyn sport túrlerin úsh sanatqa bóledi: „negizgi“, „medaldyq“ jáne ulttyq sport túrleri. Sondaı-aq kásipqoı komandalyq sport klýbtaryna arnalǵan qarjylandyrý lımıtterin bekitý jáne sporttyń basym túrlerin aıqyndaý quzyreti sport salasyndaǵy ýákiletti organǵa beriledi. Bul rette sport salasynda tikeleı biriktirilgen basqarý júıesin engizý kózdelip otyr», — dedi Úkimet basshysy jaýabynda.
Onyń aıtýynsha, atalǵan sharalar ýákiletti organǵa oblystyq dene shynyqtyrý jáne sportbasqarmalarynyń basshylylaryn, sporttyq uıymdardyń basshylaryn, oblystyq aǵa jattyqtyrýshylardy taǵaıyndaýǵa jáne qyzmetten bosatýǵa quzyret beredi. Sonymen qatar basym sport túrleriniń óńirlik tizimin bekitýge, óńirlik sportty qarjylandyrýdy bir júıege keltirýge múmkindik týǵyzady.
«Búginde balalar men jasóspirimder sport mektepterinde 134 sport túri damyp keledi. Onyń 70-i joǵary sport jetistikterine (Olımpıada, Paralımpıada jáne Azııa oıyndarynyń sport túrleri), 11-i ulttyq sport túrlerine jatady. Al qalǵan 53-i joǵaryda atalǵan sport túrleri baǵdarlamasyna kirmeıdi. Bul bıýdjet qarajatynyń basymdyq berilmeıtin sport túrlerine jumsalýyna, tıisinshe, shashyrańqylyqqa ákeledi. Osyǵan oraı qazirgi shashyrańqy basqarý júıesin ózgertý maqsatynda balalar men jasóspirimder sport mektepterinde jan basyna shaqqandaǵy qarjylandyrý ádistemesi ázirlenip jatyr. Bul bıýdjet shyǵyndaryn ońtaılandyrýdy qamtamasyz etedi jáne sport rezervin daıyndaý sapasyn arttyrady. Sizdermen osy normalardy aldaǵy ýaqytta tolyq talqylaıtyn bolamyz», — dedi Oljas Bektenov.
Buǵan deıin habarlanǵandaı, IX qysqy Azııa oıyndarynyń bastalýyna 100 kún qaldy.
