Sport salasyn reformalaý nátıjesinde 8 mlrd teńgeden astam qarajat únemdeldi – mınıstr
ASTANA. KAZINFORM – Qazaqstanda sport salasyn qarjylandyrý júıesin reformalaý nátıjesinde 8 mlrd teńgeden astam bıýdjet qarajaty únemdeldi. Qarajatty qaıta bólý arqyly balalar sportyn qoldaý, buqaralyq sportty damytý jáne ulttyq quramalardy daıarlaý baǵyttaryna basymdyq berilip otyr. Bul týraly QR Týrızm jáne sport mınıstri Erbol Myrzabosynov málimdedi.
Mınıstrdiń aıtýynsha, Memleket basshysynyń tapsyrmasymen qabyldanǵan zańnamalyq ózgerister sport salasyndaǵy memlekettik basqarýdyń tıimdiligin arttyrýǵa jáne qarjylandyrýdyń ashyqtyǵyn qamtamasyz etýge baǵyttalǵan. Atap aıtqanda, bıyl balalar sportyn qoldaýǵa qatysty jańa zań qabyldanyp, balalar men jasóspirimder sport mektepterin qarjylandyrýdyń jańa júıesi engizildi.
– Bir balany daıarlaýǵa bólinetin jyldyq qarjy 233 myń teńgeden 415 myń teńgege deıin ulǵaıtyldy. 2025–2028 jyldary jańa júıeni iske asyrýǵa 76,7 mlrd teńge qarastyrylǵan.
Sonymen qatar 2026 jylǵy 1 qańtardan bastap jattyqtyrýshy-oqytýshylarǵa kásibı sheberligi úshin 30 paıyz mólsherinde qosymsha aqy belgilendi, – dedi mınıtstr Ortalyq kommýnıkatsııalar qyzmetinde ótken baspasóz máslıhatynda.
Sportty qarjylandyrýdaǵy taǵy bir mańyzdy ózgeris – basym sport túrlerin aıqyndaý. Reforma aıasynda 160 sport túriniń ishinen Olımpıada, Paralımpıada jáne Sýrdlımpıada oıyndarynyń baǵdarlamasyna engen 67 basym sport túri belgilendi.
Bul rette ár óńirdiń geografııalyq ereksheligi men qolda bar sport ınfraqurylymynyń múmkindikteri eskerilgen. ıAǵnı sport túrlerin qarjylandyrý kezinde óńirlerdiń áleýetine basymdyq beriledi.
Budan bólek, kásibı sportty qarjylandyrý tártibi de qaıta qaraldy. Sonyń nátıjesinde 2026 jyly legıonerlerge jumsalatyn shyǵyndar bıýdjetten alynyp tastaldy.
Mınıstrdiń málimetinshe, júrgizilgen reformalardyń jalpy ekonomıkalyq tıimdiligi 8 mlrd teńgeden asty. Únemdelgen qarajat balalar men jasóspirimder sportyn damytýǵa, buqaralyq sportty qoldaýǵa, ulttyq quramalardy daıarlaýǵa jáne sport ınfraqurylymyn jetildirýge baǵyttalady.
Buǵan deıin Memleket basshysy sport salasy árdaıym memlekettiń basty nazarynda bolatynyn aıtqan edi.