Sport salasy qyzmetkerleri sý tasqynynan zardap shekkenderge bir kúndik eńbekaqysyn aýdardy
ASTANA. KAZINFORM – Sport qaýymdastyǵy sý tasqynynan zardap shekkenderge kómek kórsetý úshin birkúndik eńbekaqylaryn aýdarady.
QR Týrızm jáne Sport mınıstrligi habarlaǵandaı, atalǵan sharaǵa kómek qolyn sozýǵa 5 olımpıadalyq daıarlaý ortalyǵy, 4 mektep-ınternet kolledji, 1 sport kolledji, Sportty damytý dırektsııasy, Dene múmkindikteri shekteýli tulǵalarǵa arnalǵan sporttyq daıarlaý ortalyǵy jáne basqa da salalyq mekemeler sý tasqynynan zardap shekkenderge kómekke birkúndik eńbekaqylaryn aýdarǵan.
«Elimizdiń birneshe óńiri sý tasqynyna tap bolyp, qazirgi tańda sonyń saldarymen kúresip jatyr. Jaǵdaı aýyr, degenmen bári Prezıdenttiń udaıy baqylaýynda. Sonymen qatar sport jáne týrızm ókilderi de sý tasqynynan zardap shekkenderge «Dala qyrandary» jastar qoǵamdyq birlestigimen birlesip gýmanıtarlyq kómek kórsetedi», - delingen habrlamada.
Sonymen qatar Týrızm jáne sport mınıstrligi sport uıymdarymen, federatsııalarmen birlesip qarǵyn sýdan zardap shekken aımaqtarǵa kómek kórsetýdi uıymdastyryp jatqanyn atap ótti.
«Týrızm jáne sport mınıstrligi sport uıymdarymen, federatsııalarmen birlesip qarǵyn sýdan zardap shekken aımaqtarǵa kómek kórsetýdi uıymdastyryp jatyr. Qazirgi tańda azamattardyń amandyǵy mańyzdy. Óıtkeni adam ómirinen asqan eshqandaı qundylyq joq. Mundaı qıyn-qystaý kezeńde sport qaýymdastyǵy qarap qalmaı, erikti negizde qoldan kelgenshe kómek kórsetedi», - delingen mınıstrlik taratqan habarlamada.
Esterińizge sala keteıik, Ulttyq Olımpıada komıtetiniń vıtse-prezıdenti, bokstan Olımpıada chempıony Serik Sápıev elimizdegi sý tasqynyna qatysty pikir bildirip, «Qurmetti otandastar! Elimizdegi sý tasqynynan zardap shekkenderge sózben emes, is júzinde kómek kórseteıik», - dep úndeý jasaǵan bolatyn.
