Sport salasy árdaıym memlekettiń basty nazarynda bolady — Prezıdent
ASTANA. KAZINFORM — «Halyqtyq qurylys» baǵdarlamasyn iske asyrý barlyq salanyń, sonyń ishinde sport salasynyń damýyna aıryqsha serpin beredi. Bul týraly Prezıdent Qasym-Jomart Toqaev Azııa oıyndary jáne Azııa paraoıyndarynyń júldegerlerin marapattaý rásiminde aıtty.
— Baǵdarlama aıasynda jańa sport nysandary men ınklıýzıvti ortalyqtar boı kóteredi. Qazaqstanda árbir balanyń sportpen aınalysýǵa múmkindigi bolýy kerek. Bul — áleýmettik máni tereń mindet qana emes, osy mindettiń saıası maǵynasy áldeqaıda mańyzdy. Elimizdiń shalǵaı aýyldarynda bolashaq chempıondar, ıaǵnı, jeńimpazdar ósip kele jatyr. Olardyń bárine birdeı jaǵdaı jasalýǵa tıis. Ádiletti Qazaqstan ıdeıasynyń túpki maqsaty da — osy, — dedi Memleket basshysy.
Prezıdent sport salasy árdaıym memlekettiń basty nazarynda turatynyn aıtty.
— Byltyr «Dene shynyqtyrý jáne sport týraly» Zańǵa birqatar mańyzdy túzetý engizildi. Memlekettik deńgeıde basymdyq beriletin sport túrleri aıqyndaldy. Sońǵy bes jylda elimizde sport salasyn damytýǵa 616 mıllıard teńgeden astam qarjy jumsaldy. Jalpy, qazir osyndaı naqty sharalar óz nátıjesin berip jatyr deýge bolady, — dedi Qasym-Jomart Toqaev.
Aıta keteıik, Aqordada Prezıdent Azııa oıyndary jáne Azııa paraoıyndarynyń jeńimpazdary men júldegerlerin marapattady.
Japonııada ótken XX jazǵy Azııa oıyndary aıaqtaldy. Qazaqstan quramasy 84 medal (12 altyn, 24 kúmis jáne 48 qola) oljalap, 46 eldiń ishinde jalpykomandalyq esepte 8-orynǵa turaqtady.
Al Azııa Paraoıyndarynda Qazaqstan 50 medal jeńip alyp, úzdik ondyqqa endi.
