Sport pen óner: «Balqadısha» ánimen tanylǵan jas dzıýdoshy suhbat berdi
ASTANA. KAZINFORM – Jaqynda «Balqadısha» ánin quıqyljyta oryndaǵan jas sportshynyń beınejazbasy áleýmettik jelini sharlap ketken edi. Bir sátte jeli qoldanýshylaryn daýysymen tánti etken jas jetkinshek «Búgin LIVE» baǵdarlamasyna onlaın baılanysqa shyǵyp, óz áserimen bólisti.
– Biz Mıras aǵa ekeýmiz jaı kúresip, bástesken edik. Ol maǵan: «Básten utylsań, óleń aıtasyń», – dedi. Solaı men utylyp, «Balqadıshany» oryndadym. Vıdeo taralyp, tanymal bolǵanyn estigende óte keremet áserde boldym. Shynymdy aıtsam, tipti 2-3 kún sene almaı júrdim, – deıdi dzıýdoshy.
Isa Bekbolat dál osy beınejazba jelide keń taraǵannan soń ózine túrli usynystardyń túsip jatqanyn aıtady.
– Jalpy meniń daýysym – ózimniń tabıǵatymnan bar. Anam ándi keremet aıtady. Osy qasıet anamnan daryǵan. Men kóptegen konkýrstarda «Balqadısha» ánin oryndaǵanmyn. Bul án ózime qatty unaıdy. Osy vıdeo taraǵannan keıin Almatydan, túrli qalalardan kóptegen usynystar túsip jatyr. Biraq men sportty da, ánshilikti de qatar alyp júrgim keledi, – deıdi oqýshy.
Jas talanttyń ákesi de óner jolyndaǵy azamat eken. Dombyranyń qulaǵynda oınaıtyn Іlııas Bekbolat ulynyń talanty týraly óz pikirin bildirdi.
– Meniń mamandyǵym – dombyrashy. Biraq án aıtýǵa daýysym men qabiletim joq. «Áý demeıtin qazaq joq» demekshi, anasy da kásibı ánshi bolmasa da, dombyra tartady. Al balam arnaıy mýzyka mektebine qatyspaıdy. Almaly orta mektebiniń án sabaǵynan beretin muǵalimi birneshe konkýrsqa qatystyryp, osyndaı deńgeıge jetkizdi, – deıdi ol.
Eske sala keteıik, Qazaqstan ánshisi «Ázerbaıjan daýysy» shoýynyń jartylaı fınalyna shyqty.