Sport pen densaýlyq: Ulytaý óńirindegi jańa múmkindikter
ULYTAÝ. KAZINFORM — Ulytaý óńiri kún sanap túrlenip keledi. Jańa sporttyq keshender, shahmat akademııasy men densaýlyq ortalyqtarynyń ashylýy — jergilikti turǵyndar úshin birneshe jyl buryn qol jetpesteı kóringen arman edi. Búginde zamanaýı sport ınfraqurylymy men medıtsınalyq nysandar buqaralyq sport pen salaýatty ómir saltynyń damýyna serpin berip otyr.
Ulytaý — 2022 jyldyń shildesinde derbes oblys mártebesin ıelengen jas aımaq. Sol jyldyń qarashasynda oblys ákimdigi men «Qazaqmys» korporatsııasy áleýmettik-ekonomıkalyq yntymaqtastyq jónindegi memorandýmǵa qol qoıdy. Úsh jylǵa (2022–2025) eseptelgen kelisimniń jalpy quny — 35 mlrd teńge.
Júıe quraýshy kásiporyn retinde korporatsııa áleýmettik, bilim berý, medıtsınalyq jáne sport salasyndaǵy ınfraqurylymdy damytýǵa mindetteme aldy. Budan bólek, kelisimnen tys qosymsha 10 mlrd teńgege jýyq jobalar júzege asyrylyp jatyr.
Bolashaqqa baǵyttalǵan ınvestıtsııa
«Qazaqmys» eń aldymen buqaralyq sportty qoldaýǵa jáne halyq arasynda salaýatty ómir saltyn qalyptastyrýǵa basymdyq berip otyr. 2024 jyldyń aqpanynda Jezqazǵanda quny 8,5 mlrd teńge bolatyn «Jiger» sport-saýyqtyrý kesheni paıdalanýǵa berildi. 320 oryndyq zaly bar keshende basseın, tennıs korttary, kórkem gımnastıka men jekpe-jekke arnalǵan alańdar ornalasqan.
Sátbaev pen Keńgir kentinde de jańa sporttyq nysandar salyndy.
— Bizdiń qala úshin bul úlken qýanysh. Zamanaýı keshen bolashaq chempıondardy tárbıeleýge jol ashady. Bizde Vıtalıı Savın men Olga Koshefýdınova syndy olımpıada júldegerleri shyqqan. Olar áldeqaıda qarapaıym jaǵdaıda jattyqqan edi. Al qazir balalardyń úlken jetistikterge jetýine barlyq múmkindik jasaldy, — deıdi jeńil atletıkadan joǵary sanatty bapker Vladımır Konık.
Komandalyq sport túrleri de nazardan tys qalǵan joq. Korporatsııa jyl saıyn «Ulytaý» fýtbol klýbyn damytýǵa 500 mln teńge bóledi. Sondaı-aq 700 balaǵa arnalǵan, elimizdegi eń iri Jansaıa Ábdimálik atyndaǵy Shahmat akademııasy ashyldy.
Aldaǵy ýaqytta Balqashta taǵy bir sporttyq-saýyqtyrý keshenin salý jáne 200 sportshyǵa arnalǵan jataqhanasy bar Kúres akademııasyn damytý josparlanyp otyr.
Densaýlyq saqtaý salasyndaǵy jobalar
Sportpen qatar, korporatsııa medıtsına jáne saýyqtyrý baǵytyndaǵy bastamalardy da júzege asyrýda. Jezqazǵan qalasyndaǵy medıtsınalyq ortalyq janynan quny 240 mln teńgege baǵalanǵan ońaltý ortalyǵy ashyldy. Al Sátbaevta jańa medıtsınalyq ortalyqtyń jobalaý jumystary bastalyp, travmatologııa pýnktiniń qurylysy júrip jatyr.
Bul nysandar sporttyq ınfraqurylymdy tolyqtyryp, óńir halqynyń densaýlyǵyn nyǵaıtýǵa yqpal etetin keshendi júıe qalyptastyryp otyr.
Áleýmettik yqpal
Búginde «Qazaqmys» bastamalary jergilikti halyq tarapynan bolashaqqa salynǵan strategııalyq ınvestıtsııa retinde baǵalanyp otyr.
— Kompanııanyń sportqa qosyp otyrǵan úlesi zor. Mundaı nysandar kóbeıgen saıyn balalardyń qabiletin shyńdap, óz jolyn tabýyna múmkindik artady, — deıdi Vladımır Konık.
Osylaısha korporatsııa óndiristi damytýmen qatar, sport, densaýlyq pen bilimdi ómir sapasynyń negizgi tiregine aınaldyrǵan áleýmettik orta qurýǵa da kúsh salyp otyr.
Osyǵan deıin elimizdegi eń iri jeke medıtsınalyq mekemeleriniń biri — Jezqazǵandaǵy medortalyqtyń jumysy jaıly jazǵan bolatynbyz.