SPORT: Ótken jyly jankúıerin qýantqan 10 jeńimpaz

Ilıa Ilın. 12 jeltoqsanda Groznyıda ótken Reseı Federatsııasy Prezıdentiniń Kýbogy úshin ótken dástúrli V halyqaralyq týrnırde Ilıa Ilın eki márte álem rekordyn jańartyp, óziniń alyp kúsh ıesi ekenin taǵy bir dáleldedi. Julqa kóterýde 191 kılo salmaqpen top aldyna shyqqan Ilıa serpe kóterýde aldymen 225 kıloǵa tapsyrys berip alyp, keıin ony 231-ge ózgertti. Óıtkeni, bul kezde bir qarsylasy 230 kıloǵa tapsyrys berip qoıǵan edi. Nátıjesinde, básekelesi buǵan jete almady da Ilın aıtylǵan salmaǵyn túk qınalmastan kóterdi. Ol osynysymen-aq týrnır jeńimpazy bolyp turǵan. Biraq ol munymen toqtaǵysy kelmeı álem rekordyna talasyp kórýge táýekel etti. Ol taǵy 15 kılo qosyp, 246 kıloǵa toqtaldy. Shtangaǵa óziniń 242 kılolyq burynǵy rekordynan 4 kılo artyq salǵyzdy. Bul 436 kılo bolyp turǵan álemniń qossaıystaǵy rekordyn da jańartýǵa umtylǵany edi. Qorytyndysynda, Ilıa Ilın sol maqsatyna óte joǵary senimmen jetti. Osy kórsetkishi arqyly qossaıys boıynsha jıǵanyn 437 kıloǵa aparǵan Ilın taǵy bir rekord jańartyp úlgerdi.

Gennadıı Golovkın. Bıyl kásipqoı boksshylarymyz da aýyz toltyryp aıtarlyqtaı jetistikterge qol jetkizdi. Olardyń ishinde bıyl úsh ret jekpe-jek ótkizgen jerlesimiz Gennadıı Golovkın úsheýinde de jeńiske jetti. Jaı jeńgen joq, úsh jekpe-jegin de merziminen buryn aıaqtady. Ol sonyń nátıjesinde orta salmaqtaǵy WBA (Super), IBO, WBC (Interim) jáne IBF tujyrymdarynyń chempıony ataǵyn qorǵap keledi. Gennadıı Golovkın amerıkalyq «Bad Left Hook» basylymynyń nusqasy boıynsha 2015 jyldyń úzdik boksshysy atandy. «Bul tizimde WBC tujyrymynyń chempıony Saýl Alvares bolsa da, Gennadıı Golovkın álemde orta salmaqtaǵy №1 boksshy atandy.

Sonymen qatar, 2015 jyly jankúıerin qýantqan kásipqoı boksshy qandasymyz Qanat Islam da úsh kezdesý ótkizip, úsheýin de merziminen buryn aıaqtady. Mine, Gena da, Qanat ta - qazirge deıin jeńilip kórmegen dara sańlaqtarymyz. Bulardan tys kásipqoı boksta taǵy bir qazaq ulany týymyzdy bıikten jelbiretip keledi.

Eldos Smetov. 2015 jyly dzıýdodan Astanada álem birinshiligi ótti. Bul doda qazaqstandyqtar úshin eki birdeı ereksheligimen este qaldy. Birinshisi, sporttyń bul túrinen álem chempıonaty elimizde tuńǵysh ret ótýi. Ekinshisi, japonnyń tól kúresi sanalatyn dzıýdodan tuńǵysh ret qazaqtyń qaradomalaq uly álem chempıony ataǵyna qol jetkizýi. Tarıh paraqtaryn ashyp qarasańyz, elimiz egemendik alǵaly dzıýdodan birde-bir qazaq balasy álem chempıonatynyń eń bıik shyńyna kóterilgen emes. Bıyl birinshi bolyp, esimin tarıh qoınaýyna altyn árippen qaldyrǵan baýyrymyz - Eldos Smetov. Ol osy birinshilikte 60 keli salmaqta óner kórsetip, álem chempıony atandy.

Olga Rypakova. 2015 jyly Rıo Olımpıadasyna jeńil atletter arasynda óptegen joldamalar sarapqa salyndy. Ol básekelerden bizdiń sportshylarymyz da qalys qalǵan joq. Aıtalyq, osy jyly «sport hanshaıymy» sanalatyn jeńil atletıkadan álem chempıonaty Qytaıdyń Beıjiń qalasynda ótti. Bul básekede osydan úsh jyl buryn London olımpıadasynda «altyn qyz» atanǵan Olga Rypakova bul joly da el senimin abyroımen aqtap, Rıo Olımpıadasynyń joldamasyn jeńip aldy.

Denıs Ten. Jekeleı dárejede konkımen mánerlep syrǵanaýshy Denıs Ten 2015 jyldyń 14 aqpanynda Seýldegi «Tórt qurlyq týrnıriniń» chempıony atandy. Sonymen qatar, Denıs Ten jeltoqsanda Zagrebte ótken «Golden Spin» (Horvatııa) týrnırinde jeńiske jetti.

Jazıra Japparqul. 27 qarasha kúni AQSh-tyń Hıýston qalasynda Aýyr atletıkadan Álem chempıonaty aıasynda 69 kelige deıingi salmaq sanatyndaǵy áıelder arasyndaǵy jarys óz máresine jetti.

Bul jarysqa elimizdiń atynan eki sportshy qatysqan bolatyn. Jazıra Japparqul julqa kóterý saıysynda 116 kelini baǵyndyryp, tórtinshi orynǵa taban tirese, Maııa Maneza nebári 100 kelini ǵana baǵyndyra aldy. Al, ekinshi serpe kóterý saıysynda Jazıra - 140 keli, Maııa - 135 keli kóterdi.

Qos saıystyń nátıjesinde 256 upaı jınaǵan Jazıra Álem chempıonatynyń kúmis júldegeri atansa, 235 kelini baǵyndyrǵan Maııa úzdik ondyqqa ilikti.

Beıimbet Qanjanov. Qarashanyń 14-de qazaqstandyq sportshy Beıimbet Qanjanov Marokkoda ótip jatqan sambo boıynsha álem chempıonatynyń jeńimpazy atandy.

52 kelige deıin salmaq sanatyndaǵy fınaldyq aıqasta Qanjanov armenııalyq Tıgran Kırakosıandy 4:2 esebimen utty.

Aleksandr Zaıchıkov. Qazaqstandyq ziltemirshi Aleksandr Zaıchıkov Amerıkanyń Hıýston qalasynda ótken aýyr atletıkadan álem chempıonatynda 105 kelige deıingi salmaqta altyn medaldy oljalady.

Julqa kóterýde 191, serpe kóterýde 230 kelini eńsergen jerlesimiz jalpy esepte 421 kelini baǵyndyryp, qarsylastarynan ozyq nátıje kórsetti. Ekinshi oryndy reseılik sportshy Davıd Bedjanıan aldy, onyń jalpy kórsetkishi - 411 keli. Al úzdik úshtikti latvııalyq Artýrs Plesnıeks túıindedi. Ol julqa jáne serpe kóterýde 405 kelini baǵyndyrdy.


Elızabet Tursynbaeva. 5 jeltoqsanda Zagrebte (Horvatııa) «Chellendjer» serııasyna kiretin mánerlep syrǵanaýdan Golden Spin dástúrli halyqaralyq týrnıri máresine jetti. Bul synda álem jáne Eýropa chempıony Elızaveta Týktamysheva (201,33) jeńiske jetti. Jerlesimiz Elızabet Tursynbaeva (176,33) ekinshi oryn ıelendi. Al úzdik úshtikti AQSh ókili Karen Chen (175,35) tuıyqtady.

Eske sala keteıik, jalpy 2015 jyly qazaqstandyq sportshylar jyldy Rıo Olımpıadasyna 43 joldamamen aıaqtady. Al budan bólek, el sportshylary Olımpıada baǵdarlamasyna kirgen sport túrlerinen ótken álem chempıonattarynda 3 altyn, 5 kúmis, 4 qola medal jeńip alyp, álemdik reıtıngte 24-oryndy ıelendi.