Sport, óner jáne qosymsha bilim berý: biryńǵaı vaýcher júıesiniń pılottyq jobasy iske qosylady
ASTANA. KAZINFORM – Memleket jyl saıyn balalardyń shyǵarmashylyq úıirmelerge, sporttyq sektsııalarǵa jáne qosymsha bilim berý baǵdarlamalaryna qatysýyn qarjylandyryp keledi. Bul týraly Mádenıet jáne aqparat mınıstrligi málim etti.
Vedomstvonyń málimetinshe, ókinishke qaraı júrgizilgen tekserister barysynda birqatar kúrdeli zańbuzýshylyqtar anyqtalǵan. Atap aıtsaq, balalardy jalǵan tirkeý arqyly qatysý kórsetkishterin jasandy túrde kóbeıtip kórsetilgen, 164 sektsııada sabaqtardyń sanıtarlyq talaptarǵa saı kelmeıtin páterlerde, jertólelerde jáne turǵyn úı-jaılarda ótkizilgen, 6 óńirde buryn isti bolǵan azamattardyń balalardy oqytqany týraly 20 jaǵdaı tirkelgen, sondaı-aq júıede tirkelgenimen, naqty sabaqqa qatyspaǵan 8 myńnan astam bala anyqtalǵan.
— Bul faktiler alaıaqtyq, jalǵan esep júrgizý jáne bıýdjet qarajatyn jymqyrý yqtımaldyǵyn kórsetedi, — dep jazdy mınıstrlik.
Mundaı zańbuzýshylyqtardyń aldyn alý jáne balalar úshin qaýipsiz ári sapaly jaǵdaı jasaý maqsatynda 2025 jyldyń 1 maýsymynan bastap biryńǵaı vaýcher júıesin engizý boıynsha pılottyq joba iske qosylady. Bastama Astana, Shymkent, Qaraǵandy, Qyzylorda, Atyraý jáne Aqtóbe qalalarynda júzege asyrylady.
Atalǵan júıe memlekettik jáne jekemenshik sporttyq sektsııalaryn, shyǵarmashylyq úıirmeler men qosymsha bilim berý kýrstaryn biryńǵaı tsıfrlyq platformaǵa biriktiredi.
— Jańa júıeniń basty qaǵıdaty — vaýcher bilim berý uıymyna emes, tikeleı balaǵa beriledi. Bul balanyń sport, shyǵarmashylyq jáne bilim berý baǵyttary arasynda erkin aýysýyna múmkindik beredi jáne burynǵydaı qaıta kezekke turý nemese qarjylandyrýdan aıyrylyp qalý jaǵdaılaryna jol bermeıdi. Platformany ázirleý barysynda ár óńirdiń ereksheligi men shyǵarmashylyq, sporttyq jáne bilim berý qyzmetterinindegi aıyrmashylyqtar eskeriletin bolady, — delingen habarlamada.
Biryńǵaı vaýcherdiń eki túri qarastyrylǵan:
Nysanaly vaýcher — memlekettik mekemelerge arnalǵan jáne kezekke turýdy qajet etpeıdi;
Ámbebap vaýcher — balanyń ata-anasy eGov.kz portaly arqyly jekemenshik nemese memlekettik emes uıymdy tańdaı alady.
Mundaı vaýcher boıynsha kezek balanyń jasy men otbasynyń áleýmettik mártebesine sáıkes qalyptasady jáne bul resýrstardy ádiletti bólýge múmkindik beredi. Jańa erejelerge sáıkes, úıirmeler men sektsııalarda balalardyń sapaly damýyn qamtamasyz etý úshin qaýipsiz ınfraqurylym, sanıtarlyq jáne órtke qarsy normalardyń saqtalýy, bekitilgen bilim berý baǵdarlamalary men bilikti mamandar bolýy qajet. Bıýdjettik qarajat tek maqsatyna saı paıdalanylýy tıis. Qatysýshylardyń kelýi kúndelikti tsıfrlyq formatta tirkeledi, al biryńǵaı platforma qarajattyń jumsalýyn ashyq kórsetýdi, protsesterdi avtomattandyrýdy, sondaı-aq sybaılas jemqorlyq pen alaıaqtyq shemalaryn azaıtýdy qamtamasyz etedi.
Jobany kelesi memlekettik organdar birlesip júzege asyrady:
Mádenıet jáne aqparat mınıstrligi — shyǵarmashylyq baǵyt boıynsha;
Týrızm jáne sport mınıstrligi — sporttyq sektsııalardy úılestirý;
Oqý-aǵartý mınıstrligi — qosymsha bilim berý boıynsha;
Tsıfrlyq damý mınıstrligi — tehnıkalyq súıemeldeý jáne tsıfrlyq ınfraqurylymdy júzege asyrady.
Memlekettik organdar bıýdjettik qarajatty maqsatty jáne tıimdi paıdalanýdyń tetikterin engizý boıynsha júıeli saıasatty jalǵastyrýda. Pılottyq joba tek balalar múddesin, olardyń qaýipsizdigin jáne kórsetiletin qyzmetterdiń sapaly túrde qoljetimdi bolýyn qamtamasyz etýge baǵyttalǵan.