SPORT: OQO ákimi premer-lıganyń qola júldegerlerin qabyldady
ASTANA. 29 tamyz. QazAqparat - Búgin Ońtústik Qazaqstan oblysynyń ákimi Asqar Myrzahmetov Qazaqstan Respýblıkasy Premer-Lıga klýbtarynyń ekinshi komandalary arasyndaǵy fýtbol týrnırinde óner kórsetken «Ordabasy» FK qosalqy fýtbol komandasynyń jattyqtyrýshylary men tárbılenýshilerin qabyldady. Týrnırde qola júldeger atanǵandardy ákim sportta jetken úlken jetistikterimen quttyqtady. Bul týraly OQO ákimdiginiń baspasóz qzymetinen habarlandy.
Kezdesý barysynda óńir basshysy sońǵy jyldary óńirde buqaralyq sportty damytý baǵytynda aýqymdy jumystar atqarylyp otyrǵanyn, sonyń aıǵaǵy retinde birqatar sporttyq keshender salynǵandyǵyn atap ótti. Aldaǵy ýaqytta sporttyq gımnastıka jáne eskek esý mektepteri iske qosylatynyn jetkizdi. Memleket tarapynan kórsetilip jatqan qoldaýlardyń arqasynda el sportshylary túrli deńgeıdegi jarystarda top jaryp, úzdikter qatarynan kórinip jatqandyǵyna da ákim toqtaldy. «Fýtbol dodalarynda da jerlesterimiz úlken tabystarǵa jetip otyr, oblystyń bas komandasynyń izbasarlyǵyna talantty jastar kóptep tartylýda. Osy jastarymyz aldaǵy ýaqytta bıik tabystarǵa jeteleıdi dep úmittenemin»-dep tilek bildirdi Asqar Isabekuly jas sportshylarǵa. Oblys ákimimen bolǵan kezdesýde kásipqoı fýtbol lıgasynyń vıtse-prezıdenti E.ıÝmashev Ońtústik Qazaqstan oblysy búginde sporttyq aımaq bolyp qalyptasqandyǵyn aıttty. Ol sonymen qatar, jergilikti fýtbol komandasynyń kásipqoı komanda bolyp qalyptasýyna úlken qoldaý kórsetip otyrǵan oblys ákimdigine kásipqoı fýtbol lıgasy atynan alǵys bildirdi.
