Sport mınıstrligi Parıj Olımpıadasynda 54 sportshyǵa erekshe úmit artady
ASTANA. KAZINFORM – Týrızm jáne sport vıtse-mınıstri Serik Jarasbaev Parıj Olımpıadasynan qandaı nátıje kútetinin aıtty.
«Bul halyqty alańdatyp otyr. Memleket basshysy da aldymyzǵa tıisti mindetter qoıdy. Men árqashan aıtyp júremin, Olımpıada oıyndarynda barynsha jaqsy nátıjege qol jetkizý mindeti tur. Osynyń aldynda Tokıo Olımpıadasynda qandaı nátıje bolǵanyn bárimiz bilemiz. Bizge Prezıdent te, Úkimet te, halyq ta artqan úmit aqtalmady. Biraq bul joly Tokıo Olımpıadasynan jaqsy óner kórsetý mindeti tur», - dedi ol vedomstvonyń alqa májilisinen keıin.
Sondaı-aq, ol erekshe úmit artyp otyrǵan 50-den astam sportshy bar ekenin aıtty.
«Medalder boljamy boıynsha aıtsaq, Qazir sizderge naqty eshteńe aıta almaımyn. Biraq sportshylardyń belgili bir pýly bar – 54 sportshy. Solarǵa úlken úmit artylyp otyr, árqaısymen jeke jumys júrgizilip jatyr. Birinshi kezekte, árıne, dástúrli túrde jaqsy damyǵan boks, jeńil atletıka, velosport, atys oıyndary sııaqty sport túrleri», - dedi vıtse-mınıstr.
