Sport mınıstri ulttyq qurama komandalardyń shet elderde jattyǵýlaryna qarsylyq bildirdi
ASTANA. Tamyzdyń 9-y. QazAqparat /Gúlmıra Álıakparova/ - Ulttyq qurama komandalardyń sportshylary shet elderge shyǵyp az ýaqyt shynyqqansha, el ishinde kóbirek jattyǵýlary tıis.
Bul týraly búgin aýyr atletıka boıynsha qazaqstandyq qurama komandany aldaǵy jarystarǵa daıyndaý máselesine arnalǵan keńeste QR Týrızm jáne sport mınıstri Temirhan Dosmuhanbetov málim etti.
Keńes barysynda mınıstr, ulttyq quramalardyń sportshylary shet elderge baryp altyn ýaqyttaryn sarp etip júrgenderine qarsylyǵyn bildirip, bul rette aýyr atletshilerdiń el ishinde daıyndalyp, syrtta jetistikter kórsetip júrgenin úlgi qylyp aıtty.
«Men muny árbir keńes barysynda úlgi etip aıtamyn. Sebebi, sizder az saıahattap, kóp jumys isteısizder. Bir-birlerińizben ózara kezdesýler ótkizesizder. Qazir balýandarymyz ben boksshylarymyz nege nátıje bermeı qoıdy deısiz? Sebebi olar jan-jaqta júr. Mysalǵa Eýropaǵa barý úshin alty saǵat ári, alty saǵat beri ýaqyt ketedi. Sóıtip júrip úsh-aq kún jattyǵady. Tynymsyz jattyǵýmen ǵana úlken jetistikterge qol jetkizýge bolady», - dep atap ótti T.Dosmuhanbetov aýyr atletıkadan respýblıka bapkerlerine qaratyp aıtqan sózinde.
Sondaı-aq mınıstr, ziltemirshi sportshylardyń rezervin qurýdy tapsyrdy. Ol úshin aımaqtardaǵy jas bapkerlermen semınar-keńes ótkizip, tájirıbelermen bólisý qajettigin aıtty. Aıta keteıik, qazir barlyq oblystar men Astana jáne Almaty qalalarynda aýyr atletıkadan sektsııalar jumys isteıdi. Eń sońǵy mektep Shymkent qalasynda ashyldy.
«Bizde ziltemirshilerdi daıyndaıtyn úlken mektep bar. Eger aldaǵy olımpıada oıyndarynda taǵy úsh medal alsańyzdar, álem sizderge qarap boı túzeıtin bolady. Sonymen birge, sizderdiń eńbekterińizben ázirlengen ádistemelikti joǵaltyp almaýymyz qajet», - dedi ol.
