Sport mınıstri: Parıj Olımpıadasyna 80-85 joldamamen barsaq dep otyrmyz
ASTANA. KAZINFORM – Parlament palatalarynyń birlesken otyrysynda Týrızm jáne sport mınıstri Ermek Marjyqpaev Qazaqstan sportshylary Parıjde ótetin Olımpıada oıyndaryna aýyr atletıkadan bir de bir joldama almaǵanyn aıtty.
«Olımpıada – eń úlken mańyzdy doda. Parıjdegi jarysqa 205 memlekettiń 10,5 myń sportshysy 32 túrinen qatysady. Búgingi tańda bizde 22 sport túrinen 78 lıtsenzııa bar. Ókinishke qaraı, bıyl áıelder kúresi men aýyr atletıkadan lıtsenzııa ala almadyq», - dedi ol.
Mınıstr eń kóp joldama alǵan óńirlerdi de atady.
«Óńirlerge kelsek, eń úlken úles qosqan ózimizdiń Almaty qalasy – 16 joldama. Shymkent qalasynan – 12, Astana qalasynan – 9, Shyǵys Qazaqstan, Túrkistan, Jetisý oblystarynan 5 joldamadan bar. Áli 4 reıtıngilik-lıtsenzııalyq týrnır bar. Jalpy jıyny 80-85 joldama alyp, Parıj Olımpıadasyna baramyz dep úmittenemiz», - dedi Ermek Marjyqpaev.
