Sport mınıstri Mıhaıl Shaıdorovtyń kelisimshartyna qatysty daý-damaıǵa jaýap berdi
ASTANA. KAZINFORM — Týrızm jáne sport mınıstri Erbol Myrzabosynov mánerlep syrǵanaýshy Mıhaıl Shaıdorov tóńiregindegi daý-damaı jóninde tilshilerge jaýap berdi. Buǵan deıin sportshy ózine ýáde etilgen syıaqynyń tólenbegenine shaǵymdanǵan edi.
— Mıhaıl Shaıdorovtyń kelisimshartyna qatysty másele tolyq sheshildi. Kelisimshart talaptary jan-jaqty túsindirilip, qol qoıyldy. Bul — halyqaralyq tájirıbege, dopıngke qarsy agenttiktiń jáne Dúnıejúzilik dopıngke qarsy agenttiktiń (WADA) usynymdaryna sáıkes ázirlengen ádettegi kelisimshart. Biz árbir sportshy úshin bólek kelisimshart jasaı almaımyz, barlyq kelisimde ortaq erejeler qoldanylady, — dedi mınıstr Úkimette ótken baspasóz máslıhatynda.
Onyń aıtýynsha, mınıstr men sportshy birge kelisimshartty zerdelep shyqqan.
— Biz Mıhaılmen birge qujatty qarastyryp, tujyrym jasadyq. Shynynda da, eki taraptan da kommýnıkatsııada olqylyqtar bolǵan. Oryndaýshy menedjerler kelisimshart talaptaryn durys túsindirmegendikten, osyndaı jaǵdaı týyndady. Eki taraptaǵy jaýapty menedjerler óz mindetin tolyq atqarmaǵany úshin jazalandy, — dedi Erbol Myrzabosynov.
Sonymen birge, tilshiler M. Shaıdorovtyń kelisimshartynda 2030 jylǵy Olımpıada oıyndarynda mindetti túrde medal jeńip alý týraly tarmaqtyń bar-joǵyn jáne Sofıa Samodelkınamen jasalǵan kelisimshart jóninde surady.
— Sofıa Samodelkınaǵa qatysty da kelisimshartqa qol qoıyldy. Eshqandaı másele joq. Mıhaıl Shaıdorovtyń komandasy AQSh-qa eki aıǵa daıyndyq jıynyna attanady. Kelisimshartta qandaı da bir qarjyny qaıtarý mindeti qarastyrylmaǵan. Bul jaı ǵana kelisimshart. Barlyq sport túrlerinde bizde belgili bir boljamdar bolady. Qysqy Olımpıada oıyndarynyń aldynda da osy jerde medaldarǵa qatysty mindettemeler jóninde pikirtalas bolǵan edi. Sol kezde qansha medal alatynymyz aıtyldy. Biz buǵan deıin segiz jyl boıy Olımpıada medalin jeńip almaǵanymyzdy eskerdik. Sondyqtan osy Olımpıadada kem degende bir medal bolady dep mindetteme aldyq. Meniń oıymsha, bul mindetti komandamyzben birge barynsha oryndadyq, — dedi mınıstr.
Aıta ketelik, araǵa 32 jyl salyp qysqy Olımpıada tórinde Qazaqstan Ánurany shyrqalǵan edi. Italııanyń Mılan jáne Kortına-d’Ampetstso qalalarynda ótip jatqan XXV qysqy Olımpıada oıyndarynda mánerlep syrǵanaýshy Mıhaıl Shaıdorov altyn pedal jeńip aldy.
