Sport mınıstri: Basty maqsatymyz — Azııa oıyndarynda medal sapasyn jaqsartý
ASTANA. KAZINFORM — Japonııada ótetin HX jazǵy Azııa oıyndarynda el namysyn qorǵaıtyn sportshylar jeńimpaz bolýǵa tyrysady. Bul týraly Týrızm jáne sport mınıstri Erbol Myrzabosynov aıtty.
— Endi Azııa oıyndaryna attanamyz. Quramamyz 570 sportshydan jasaqtalǵan. 200-ge jýyq jattyqtyrýshylar men dárigerler bar. Bıyl Azııa oıyndaryna kiretin sport túrlerinen álemdik deńgeıde jaqsy nátıjeler kórsettik, sportshylarymyzǵa sáttilik tileımiz. Bir aıta keterligi, jekpe-jek sportynan bólek voleıbol, basketbol, gandbol, kógaldaǵy hokkeı, kıbersort túrlerinen de iriktelip, Azııa oıyndaryna qatysamyz. Bul elimizdegi olımpıadalyq barlyq sport túriniń qarqyndy damyp jatqanyn kórsetedi. Aldaǵy Azııa oıyndarynda buǵan deıingi baıraqty básekelerge qaraǵanda joǵary nátıje kórsetemiz dep senemin, — dedi Erbol Myrzabosynov Dúnıejúzilik kóshpendiler oıyndary jeńimpazdaryn marapattaý rásimi aıasynda.
Mıınstr 2022 jyly Qytaıdyń Hanchjoý qalasynda ótken Azııa oıyndarynda sportshylarymyz 10 ǵana altyn medal alǵanyn, júldeniń basym bóligi kúmis pen qola bolǵanyn atap ótti.
— Endigi basty maqsatymyz — osy Azııa oıyndarynda medal sapasyna barynsha kóńil bólý. Árıne, Azııa qurlyǵynda olımpıadalyq sport túrleri myqty damyǵan. Bizde sońǵy 2 jylda barlyq jaǵynan tyńǵylyqty daıyndyq jasadyq, — dedi ol.
Aıta keteıik, búgin elordadaǵy Táýelsizdik saraıynda Memleket basshysy Qasym-Jomart Toqaev VI Dúnıejúzilik kóshpendiler oıyndarynyń jeńimpazdaryn marapattady.
