Sport mektepteriniń balalary tegin úıirmege qatysýshy retinde tirkelip kelgen
NUR-SULTAN. QazAqparat – Úkimet otyrysynda QR Mádenıet jáne sport mınıstri Dáýren Abaev balalarǵa arnalǵan tegin úıirmelerdi qarjylandyrý isindegi bylyqtar týraly málimet berdi, dep habarlaıdy QazAqparat tilshisi.
«Art sport baǵdarlamasyn muqııat naqtylaý qajet. Eń aldymen, ony memlekettik derekter bazasymen ıntegratsııalaý kerek. Júıe jumysynda qujatta bar, ómirde joq jandardy qarjylandyrýǵa, kelýshiler sanyn qoldan kóbeıtýge, jetkizýshiler men qarjylandyrýdyń qaıtalanýyna, balalardy sektsııalar men úıirmelerge jetkizýshilerdiń óz qolymen qabyldaýyna múmkindik beretin olqylyqtar bar», - dedi vedomstvo basshysy.
Onyń aıtýynsha, bir jattyqtyrýshy úıirme qyzmetin usynatyn birneshe mekemeniń ótinimderinde qatar júretin jaǵdaılar jıi kezdesetin kórinedi.
«Tipti sport mektepteriniń oqýshylaryn úıirmege qatysýshy retinde tirkeý faktileri anyqtaldy. Shyn máninde, bul osyndaı olqylyqtardyń saldarynan alaıaqtyq shemalar men qyzmetti asyra paıdalaný beleń alýda. Al odan adal jolmen jumys isteıtin úıirme qyzmetin usynýshylar men úıirmege shyn muqtaj balalar zardap shegedi», - dedi Dáýren Abaev.
