Sport mektebi jattyqtyrýshylaryna tólenetin ústemeaqy ózgerdi
ASTANA.KAZINFORM — Úkimet qaýlysymen azamattyq qyzmetshilerdiń, memlekettik bıýdjet qarajaty esebinen ustalatyn uıymdar qyzmetkerleriniń jáne qazynalyq kásiporyndar jumyskerleriniń eńbekaqy tóleý júıesine ózgerister engizildi.
Atap aıtqanda, azamattyq qyzmetshilerge, memlekettik bıýdjet qarajaty esebinen ustalatyn uıymdar qyzmetkerlerine jáne qazynalyq kásiporyn jumyskerlerine arnalǵan bazalyq laýazymdyq aılyqaqy mólsheri 17 697 teńge bolyp belgilendi.
Sonymen qatar dene shynyqtyrý jáne sport salasyndaǵy azamattyq qyzmetshilerge, memlekettik bıýdjet qarajaty esebinen ustalatyn uıymdar qyzmetkerlerine jáne qazynalyq kásiporyn jumyskerlerine eńbek jaǵdaıyna baılanysty tólenetin qosymsha aqylar men ústemaqylarǵa túzetýler engizildi.
Atap aıtqanda, Olımpıadalyq daıarlaý ortalyǵynyń, balalar men jasóspirimder sport mektepteriniń, olımpıadalyq rezervtiń mamandandyrylǵan balalar men jasóspirimder sport mektepteriniń, mamandandyrylǵan balalar men jasóspirimder sport mektepteriniń, sport kolledjderiniń, sportqa daryndy balalarǵa arnalǵan mektep-ınternattardyń, mektep-ınternat-kolledjderdiń, joǵary sport sheberligi mektepteriniń, olımpıadalyq rezervti daıarlaý ortalyǵynyń, múmkindigi shekteýli adamdarǵa arnalǵan sporttyq daıarlaý ortalyǵynyń, ulttyq jáne at sporty túrleri ortalyǵynyń, Sportty damytý dırektsııasynyń jáne sport klýbtarynyń qyzmetkerlerine mynadaı ústemaqylar belgilenedi:
Qazaqstan Respýblıkasynyń chempıonattarynda, QR spartakıadalarynda, jastar oıyndarynda jáne QR Paralımpıada oıyndarynda:
І oryn úshin — laýazymdyq aılyqaqynyń 1,5%-y;
ІІ oryn úshin — 1%-y;
ІІІ oryn úshin — 0,5%-y.
— Bul norma respýblıkalyq joǵary sport sheberligi mektebine qoldanylmaıdy, — delingen qujatta.
Al Qazaqstan Respýblıkasynyń jastar men jasóspirimder arasyndaǵy chempıonattarynda І oryn úshin laýazymdyq aılyqaqynyń 1%-y bekitilgen. Sondaı-aq atalǵan norma respýblıkalyq olımpıadalyq daıarlaý ortalyqtaryna, sport kolledjderine jáne joǵary sport sheberligi mektepterine qoldanylmaıdy.
Jattyqtyrýshylar men sport boıynsha jattyqtyrýshy-oqytýshylarǵa chempıondar men júldegerlerdi daıyndaǵany úshin tólenetin ústemaqylar:
Qazaqstan Respýblıkasynyń chempıonattarynda, QR spartakıadalarynda, jastar oıyndarynda jáne QR Paralımpıada oıyndarynda:
І oryn úshin — laýazymdyq aılyqaqynyń 15%-y;
ІІ oryn úshin — 10%-y;
ІІІ oryn úshin — 5%-y.
Qazaqstan Respýblıkasynyń jastar men jasóspirimder arasyndaǵy chempıonattarynda:
І oryn úshin — laýazymdyq aılyqaqynyń 10%-y.
Sonymen qatar qurmetti ataǵy bar qyzmetkerlerge mynadaı ústemaqylar belgilendi:
Burynǵy Keńestik sotsıalıstik respýblıkalar odaǵynyń (KSRO) «Halyq» qurmetti ataqtary jáne mádenıet salasyndaǵy eńbegi úshin berilgen Qazaqstan Respýblıkasynyń qurmetti ataqtary bar qyzmetkerlerge — bazalyq laýazymdyq aılyqaqynyń 100%-y mólsherinde;
Burynǵy KSRO-nyń «Eńbek sińirgen» qurmetti ataqtary jáne Qazaqstan Respýblıkasynyń osyǵan uqsas qurmetti ataqtary bar qyzmetkerlerge — bazalyq laýazymdyq aılyqaqynyń 30% mólsherinde ústemaqy tólenedi.
Qaýly 2026 jylǵy 3 tamyzdan bastap qoldanysqa engiziledi.
Buǵan deıin elimizde sport mamandaryn daıarlaý isi jańa deńgeıge kóterilgenin jazǵanbyz.
