Sport kúni qarsańynda sala qyzmetkerleri marapattaldy
«Bizdiń elimizde sport ár túrli jastaǵy, ult pen kásiptegi kóptegen adamdardyń basyn biriktiredi. Sportta áleýmettik mártebege nemese geografııaǵa eshqandaı shekteýler joq. Shyntýaıtyna kelgende, sport mańyzdy adamı qundylyqtarǵa ıe jáne de sport jalpy ulttyń fızıkalyq densaýlyǵyn nyǵaıtýǵa yqpal etedi. Jyldan-jylǵa sport qaýymdastyqtary men sektsııalarynyń sany artyp, sportpen únemi aınalysatyn azamattardyń sany artyp keledi. Árıne, bul jerde jattyqtyrýshylardyń, tóreshilerdiń jáne sport menedjerleriniń eńbegi zor. Munyń bári olardyń tańdaǵan mamandyǵyna degen yntasy men adaldyǵyna tikeleı baılanysty», - dedi Dáýren Abaev.
Saltanatty is-shara olımpıada rezerviniń oblystyq jáne respýblıkalyq mamandandyrylǵan mektep-ınternat-kolledjderiniń jumysy máseleleri jónindegi keńes sheńberinde ótti.
«Qazir mektep-ınternat-kolledjderde taıaý jyldary ótetin iri jarystarda el namysyn qorǵaıtyndar oqyp júr. Bir sózben aıtqanda, Sizder Qazaqstannyń sport elıtasyn daıyndap jatyrsyzdar. Biraq ókinishke qaraı, daıyndaǵan shákirtterdiń qazirgi nátıjeleri alańdaýshylyq týdyrady. Kóptegen parametrler boıynsha birqatar mektep-kolledj-ınternattardyń kórsetkishteri kádimgi sport mektepterinen tómen. Bul jattyǵý protsesinde, psıhologııalyq daıarlyqta, oqytý ádisnamasynda olqylyqtardyń bar ekenin bildiredi», - dedi mınıstr.
Onyń aıtýynsha, mektepterdegi kadr máselesine erekshe nazar aýdarý qajet. Mektep-ınternat-kolledjderde úzdik jattyqtyrýshylar men ádiskerler jumys isteýi tıis.
Mınıstr mektep-ınternat-kolledjderge oqýshylardy qabyldaý kezinde baqylaýdy kúsheıtýdi, joǵary synyp jáne kolledj sportshylarynyń nátıjelerine júıeli taldaý jasaýdy, sondaı-aq qarjylyq jaǵdaı men bilikti mamandardyń bolýyn eskere otyryp, sport túrlerin ońtaılandyrýdy qarastyrýdy tapsyrdy.
Foto: QR Mádenıet jáne sport mınıstrliginiń baspasóz qyzmeti
