Sport kúni: Astanada dene shynyqtyrý jáne sport qyzmetkerleriniń spartakıadasy bastaldy
ASTANA. KAZINFORM - Astana qalasynda Sport kúnine oraı dene shynyqtyrý jáne sport uıymdarynyń qyzmetkerleri arasynda spartakıada bastaldy, dep habarlaıdy QR Týrızm jáne sport mınıstrliginiń baspasóz qyzmeti.
Spartakıadaǵa elimizdiń óńirlerinen 20 komanda, 600-den astam qatysýshy jınalyp, sporttyń tórt túri – fýtzal, voleıbol, shahmat jáne toǵyzqumalaq boıynsha baq synaıdy.
Іs-sharanyń basty maqsaty – dene shynyqtyrý men sport salasynyń qyzmetkerleri arasynda salaýatty ómir saltyn nasıhattaý, buqaralyq sportty damytý jáne áriptester arasynda dostyq qarym-qatynasty nyǵaıtý.
Spartakıadanyń ashylý rásimine QR Týrızm jáne sport mınıstrligi Sport jáne dene shynyqtyrý isteri komıtetiniń Olımpıadalyq emes jáne buqaralyq sport basqarmasynyń basshysy Aıdos Esenalıev qatysyp, jarysqa qatysýshylarǵa sáttilik tiledi.
-Sport kúni – dene shynyqtyrý men buqaralyq sporttyń mańyzyn keńinen nasıhattaıtyn aıtýly mereke. Búgingi spartakıada – sport salasynyń qyzmetkerlerin biriktirip qana qoımaı, salaýatty ómir saltyn ustanýdyń jaqsy úlgisi. Barsha qatysýshylarǵa sáttilik,jeńis jáne joǵary nátıjeler tileımin, – dedi Aıdos Esenalıev.
Jarys barysynda qatysýshylar ózderiniń sporttyq sheberlikterin kórsetip, komandalyq rýh pen uıymshyldyqty tanytady. Spartakıada qorytyndysy boıynsha úzdik komandalar men júldegerler anyqtalady.
Osyǵan deıin astanalyqtar olımpıada chempıondarmen birge 10 myń qadam júrdi.
