Sport kommentatory bolǵysy keletinderdiń arasynda mektep oqýshylary da bar - «Kazsport» arnasy
ASTANA. QazAqparat - «Kazsport» telearnasynda sport kommentatorlaryna jarııalanǵan kastıngtiń birinshi kezeńi aıaqtaldy.
Onyń qorytyndysy boıynsha 200-ge jýyq adam kommentator bolýǵa nıet bildirdi. Alaıda olardyń tek 10-y ǵana kelesi kezeńge joldama aldy, dep xabarlaıdy QazAqparat tilshisi "Qazaqstan RTRK" AQ baspasóz qyzmetine silteme jasap.
Birinshi kezeńde telearnanyń elektrondy poshtasyna 193 ótinim kelip tústi. Sonyń basym bóligi Almaty qalasy men Almaty oblysynan joldandy. 62 ótinim basqa qalalardan tústi. "Túıindemeleri talapqa saı toltyrylmaǵan, hattary «men kastıngke qatysqym keledi» degen bir aýyz sózben shektelgen, mektepti áli aıaqtamaǵan 48 ótinish ıeleriniń kandıdatýralary qarastyrylǵan joq. Sebebi kastıng shartyna sáıkes, baıqaýǵa jasy 18-den asqan, bir nemese birneshe sport túrin jetik meńgergen azamattar qatysa alady"-delingen resmı xabarlamada.
Ótken demalys kúnderi kastıngtiń birinshi kezeńi boıynsha 10 úmitker kelesi kezeńge joldama aldy. Olardyń beseýi fýtbol kommentatorlyǵyn tańdasa (2-eýi - qazaq, 3-eýi orys tilinde), eki úmitker qyz taekvondo translıatsııasyn qazaq tilinde júrgizip, biliktilikterin dáleldedi. Sonymen qatar, qazaq jáne orys tilderinde erkin sóıleı alatyn erejesiz jekpe-jektiń eki kásibı sheberi ózderinen jaqsy kommentator shyǵatyndaryn baıqatty. Hokkeı jankúıerleri de jaqyn kúnderi qazaq tilinde reportaj júrgize alatyn jańa kommentatormen tanysa alady.
"Kastıngtiń ekinshi kezeńi bastalyp ketti. Qarasha aıynyń sońyna deıin iriktelip alynǵan úmitkerler taǵy birneshe synaqqa qatyspaq. Jeltoqsan aıynyń basynda úzdik shyqqandar «Kazsport» telearnasynda kommentatorlyq jumysqa kirisedi", - deıdi uıymdastyrýshylar.
