Sport komıteti Shymkenttegi chempıonat jónindegi daýǵa qatysty pikir bildirdi

NUR-SULTAN. QazAqparat – Qazaqstan Respýblıkasy Mádenıet jáne sport mınıstrliginiń Sport jáne dene shynyqtyrý isteri komıteti Shymkent qalasynda ITF taekvondodan klýbtyq Azııa chempıonatyn ótkizýge qatysty pikir bildirdi, dep habarlaıdy QazAqparat tilshisi.

Vedomstvoda habarlanǵandaı, búgingi kúni elimizde taekvon-do ITF sport túrin elde jáne halyqaralyq deńgeıde usynýǵa quqyǵy bar, ıaǵnı osy sport túrin damytýmen aınalysatyn respýblıkalyq akkredıttelgen sport federatsııasy joq.

Búgingi kúni «Qazaqstan Respýblıkasynyń Taekvon-do ITF federatsııasy» QB qyzmeti Qazaqstan Respýblıkasy Mádenıet jáne sport mınıstriniń 2014 jylǵy 27 qarashadaǵy № 121 buıryǵymen bekitilgen qaǵıdasy negizinde alty aı ótken soń akkredıtteý týraly kýálikti toqtatýǵa negizdeme bolǵan sebepterdiń joıylmaýyna baılanysty toqtatyldy. Sondaı-aq, Ulttyq Olımpıada komıtetiniń «Taekvondo ITF» sport túri boıynsha osy federatsııany tanýdan bas tartý týraly hatyna baılanysty komıtet «Qazaqstan Respýblıkasynyń Taekvon-do ITF federatsııasy» QB akkredıtteý týraly kýáligin qaıtaryp alý týraly buıryq shyǵardy», - delingen Sport jáne dene shynyqtyrý isteri komıtetiniń habarlamasynda.

Sonymen qatar, halyqaralyq deńgeıdegi jarystardy ótkizý úshin federatsııalar jarys reglamentin Mádenıet jáne sport mınıstrligimen, sondaı-aq jańadan qurylǵan «Qazaqstannyń jaýyngerlik óner qaýymdastyǵy» zańdy tulǵalar birlestigimen kelisýi qajet.

«Bul jaǵdaıda Azııa chempıonatyn ótkizý týraly kelisim bolǵan joq. Joǵaryda baıandalǵanǵa negizdelgende, A.T. Amanjolov basqaratyn «Taekvon-do ulttyq sport federatsııasy (ITF)» qoǵamdyq birlestiginiń Shymkent qalasynda ótkizgen taekvondodan klýbtyq Azııa chempıonaty zańdy emes», - delingen habarlamada.