Sport qazirgi zamanda úlken pozıtıvti rol atqarady - Sábıt Dosanov
ALMATY. 17 qańtar. QazAqparat /Aıgúl Turysbekova/ - Sport qazirgi zamanda úlken pozıtıvti rol atqarady.
Onyń negizinde halyqtar arasyndaǵy beıbitshilik pen dostyq ıdeıalary jatyr. Azıada oıyndarynyń Qazaqstanda ótkizilýi - halyqaralyq qoǵamdastyq tarapynan bizdiń elimizge kórsetilgen úlken senim. Bul týraly QazAqparat tilshisine bergen suhbatynda M.Sholohov atyndaǵy halyqaralyq syılyqtyń laýreaty, Qazaqstannyń eńbek sińirgen qaıratkeri, Reseıdiń Pedagogıkalyq jáne áleýmettik ǵylymdar akademııasynyń akademıgi, professor Sábıt Dosanov aıtty.
Osynaý aıtýly oqıǵanyń elimizdiń Táýelsizdik merekesiniń 20 jyldyǵynda ótkeli otyrǵanyn atap kórsetken S.Dosanov, «tarıhı turǵydan qysqa ǵana merzimniń ishinde elimiz álem jurtshylyǵynyń aldynda úlken bedelge ıe bolyp otyr. Bizge artylyp otyrǵan senim, osy jetistikterdiń dáleli. Búginde árbir qazaqstandyq óz elin maqtan tutady», - dedi.
"Kóptegen qazaqstandyqtar sııaqty bizdiń sportshylarymyzdyń halyqaralyq jarystardaǵy jetistikterin qadaǵalap otyratynyn jetkizgen jazýshy, «biz olardyń árqaısysynyń jetistigin elimizdiń abyroıyna qosqan úlken úles dep qabyldaımyz. Biraq biz óz sportshylarymyzdy daıyndaýymyz kerek. Azıada buqaralyq sportty damytýǵa qýatty serpin bola alady. Osynaý salaǵa, ásirese, aýyl sportyna kóbirek nazar aýdaratyn kez keldi. Aýyldaǵy qaradomalaqtardyń arasynda bolashaq chempıondar júrgenine senimdimin", - dedi.
