SPORT: Qazaqstanda street workout keń etek jaıyp keledi (FOTO)
ASTANA. QazAqparat - Qazaqstan úshin jańa sporttyń túri «street workout» (kóshedegi sport) jastar arasynda keń tarap keledi. Respýblıkada sporttyń bul túrimen shuǵyldanatyndardyń sany 100 myńnan assa, Astanada 10 myńǵa jetti, dep habarlady QazAqparat tilshisi.
Street workout - Kóshedegi, aýlalardaǵy týrnıkte , taǵy osy sekildi sport qurylǵylarda jasaıtyn jalpyhalyqtyq jattyǵýlary bar sport túri. Jattyǵýlardy tipti jerde de oryndaýǵa bolady.
Qazaqstanda street workout resmı túrde sporttyń bir túri dep tirkeldi. QR Sport isteri men dene shynyqtyrý agenttiginde tirkelgen street workout boıynsha federatsııasy da jumys isteıdi. Al bul sporttyń elimizdegi tarıhy 2009 jyly bastalǵan. Federatsııa prezıdenti Islam Badýrgov pen vıtse-prezıdenti Ramazan Omarov bul sportty Qazaqstanda taratqan.
Astananyń qysy sýyq bolǵandyqtan biraz qıyndyqtar týyndapty. Biraq demeýshilerdiń kómegimen sporttyń bul túrimen aınalysatyndar tolyq jabdyqtalǵan «Bar Bars» mamandandyrylǵan sport zalyn ashypty. Munda 12 jasqa deıingi balalar men turmys jaǵdaıy tómen jáne kópbalaly januıanyń balalary tegin sportpen shuǵyldana alady. Búginde street workout-qa degen qyzyǵýshylyqtyń artqany sonsha, qys mezgiliniń ózinde 200 adam jattyǵady, taǵy sonshamasy dálizde óz kezegin kútip turady eken.
Qazirgi kezde qazaqstandyq federatsııa túrli sharalar uıymdastyryp turady, onyń ishinde qaıyrymdylyq sharalary da bar. Elordalyq «Bar Bars» quramasy shaqyrtýmen Reseı, Ýkraına, BAÁ-de boldy.
Street workout - sporttyń qoljetimdi túri. Ol kóp qarjyny qajet etpeıdi jáne spottyń qaýipsiz túri bolyp sanalady.
«Aýlada ótkizetin jattyǵýlar úshin aqsha almaımyz. Qyzyǵýshylyq tanytqandarǵa úıretýge ázir tájirıbeli atletterimiz bar. Bizde jeke jattyǵý úshin aqsha alýǵa bolmaıdy», - dedi Islam. «Jaý júrek myń bala» fılminde oınaǵan ataqty qazaqstandyq júrgizýshi jáne akter Artýr Tólepov te sporttyń bul túrimen shuǵyldanady eken. «Street workout meniń ómirimde mańyzdy oryn alyp otyr. Óıtkeni bizdiń «Bar Bars» komandamyz úlken bir otbasy sııaqty. Biraz ýaqyttan keıin Street workout-qa qyzyǵýshylyq tanytqandardyń sany odan da arta túsetinine senimdimin!» - dedi Artýr.
