Sport ǵımarattary oqýshylarǵa tegin bolýy kerek - BǴM
ASTANA. QazAqparat - Bilim jáne ǵylym mınıstrligi jergilikti jerlerdegi sport ǵımarattarynyń oqýshylar úshin tegin qyzmet kórsetýi kerektigi týraly másele kóterdi. Ol týraly búgin Parlament Senatynda sportty damytý máselelerine arnalǵan Úkimet saǵatynda Bilim jáne ǵylym vıtse-mınıstri Esenǵazy Imanǵalıev málim etti.
«Biz Mádenıet jáne sport mınıstrligine prezıdenttik test tapsyrý barysyndaǵy jetistikteri úshin oqýshylarǵa sporttyq belgiler engizýdi usynamyz. Budan bólek, jastar arasynda dene shynyqtyrýǵa, sportqa daıyndyq máselelerine qatysty monıtorıng engizilýi tıis», - dedi vıtse-mınıstr. Onyń aıtýynsha, sport ǵımarattarynyń qoljetimdiligin qamtý da ózekti másele.
«Jergilikti atqarýshy organdar sport ǵımarattaryn tegin jeńildikpen paıdalaný quqyǵyn qamtamasyz etýleri kerek, sonyń ishinde jetim balalarǵa sporttyq ǵımarattarǵa barýda basymdyq quqyǵy bolǵany durys», - dedi E. Imanǵalıev.
Budan bólek, vıtse-mınıstr aýqymdy turǵyn úıler alabynan sportyq aýla klýbtaryn salý, aýlalyq sport alańdarynyń qurylysy, aýdandyq bilim berý bólimsheleri janynan jasóspirim balalardyń sporttyq klýbtaryn qurý máselelerine toqtaldy.
