Sport federatsııalary basshylarynyń tıimdiligin baǵalaý júıesin engizý usynyldy
ASTANA. KAZINFORM - Búgin QR Týrızm jáne sport mınıstrligi janyndaǵy Qoǵamdyq keńestiń otyrysynda sport salasyna qatysty Komıssııa músheleri sport federatsııalary basshylarynyń jumysyn baǵalaý úshin KPI júıesi men ádistemesin engizý usynyldy.
Atalǵan kórsetkishter federatsııa basshylarynyń jeke mindettemesi retinde aıqyndalyp, akkredıtatsııadan ótý kezindegi mindetti shartyna aınalmaq.
Otyrysta Qoǵamdyq keńes ókilderi sport federatsııalary basshylaryna tómendegi tıimdilik kórsetkishterin oryndaý jóninde mindet júkteýdi usyndy:
- tıisti sport túrin qoldaýǵa respýblıkalyq jáne jergilikti bıýdjetten bólinetin qarajattyń keminde 10%-yna teń mólsherde demeýshilik qarajat tartý.
Mysaly, sport túrin damytýǵa (respýblıkalyq jáne jergilikti bıýdjetterden) 15 mlrd teńge bólinse, Federatsııanyń úlesi keminde 1,5 mlrd teńge bolýǵa tıis. Bul qarajatty qarjylyq eseptiń ashyqtyǵyn qamtamasyz etý úshin biryńǵaı operator – «Týrızm jáne sport ındýstrııasyn qoldaý qory» KQ arqyly baǵyttaý usynylady.
- olımpıadalyq tsıkl (4 jyl) ishinde naqty sport túri boıynsha Qazaqstan ulttyq quramalaryn daıyndaý standarttaryna saı keletin keminde bir sport keshenin salý nemese jańǵyrtý úshin ınvestor tartý;
- olımpıadalyq tsıkl ishinde Federatsııanyń óz qarajaty esebinen chempıondar men halyqaralyq jarystardyń júldegerlerin daıyndaǵan keminde úsh bilikti sheteldik jattyqtyrýshy men keńesshini tartý;
- halyqaralyq federatsııalarda keminde bir otandyq ókildiń qyzmet etýin jáne Olımpıada men Azııa oıyndarynda qazaqstandyq tóreshilerdiń tórelik etýin qamtamasyz etý.
-Osylaısha sport federatsııalary basshylary óz komandalaryn jan-jaqty damytýǵa, ulttyq quramalardyń túrli deńgeıdegi halyqaralyq jarystarda, sonyń ishinde Olımpıada jáne Azııa oıyndarynda joǵary nátıje kórsetýine baǵyttalǵan mindettemelerdi oryndaýǵa jaýapty bolady,-delingen habarlamada.
Usynylǵan KPI kórsetkishteriniń oryndalý barysy Qoǵamdyq keńestiń otyrysynda jylyna eki ret tyńdalyp otyrýy usynyldy.
Sonymen qatar Qoǵamdyq keńestiń sport federatsııalary qyzmetine qatysty qorytyndylary kópshilikke qoljetimdi bolyp, buqaralyq aqparat quraldarynda jarııalanatyn bolady.
Osyǵan deıin memlekettik aýdıtten keıin sport salasynda baqylaý men esepke alý kúsheıtiletini týraly jazdyq.