Sport: endi legıonerlerdi demeýshiler qarajatyna ǵana tartýǵa bolady

ASTANA. KAZINFORM – QR Týrızm jáne sport vıtse-mınıstri Serik Jarasbaev elimizdiń sportyndaǵy legıonerlerge qatysty pikir aıtty.

— Legıonerlerge qatysty qoǵamda kóptegen suraq qoıylǵan edi. Qazirgi kórsetkishterge toqtalsaq, fýtboldan byltyrǵy premer-lıgada 14 klýb oınady. Onyń ishinde 325 fýtbolshynyń arasynda 149 legıoner bolǵan, ıaǵnı 50 paıyzǵa jýyǵyn qurady. Sportqa qatysty zań (Parlament qabyldady) kúshine engennen keıin, olardy bıýdjetten jáne kvazımemlekettik sektordan ary qaraı qaraı qarjylandyrý toqtatylady. Osy oraıda biz buǵan deıin barlyq óńirlerdegi klýbtarǵa, federatsııalarǵa jańa tártip kúshinen enetinin eskerttik, — dedi S. Jarasbaev Senatta tilshiler suraǵyna jaýap bere otyryp.

Onyń aıtýynsha, hokkeı sportynda qazir 109 legıoner bar. Al qalǵan sport túrlerinde olardyń sany kóp emes.

— Atalǵan zańda bıýdjetten jáne kvazımemlekettik sektordan qarjylyndyrýǵa tyıym salynyp otyr. Eger bolashaqta belgili bir aımaqtyq klýb óz qataryna basqa elderden sportshy shaqyrǵysy kelse, oǵan tyıym salynbaıdy. Biraq oǵan tólenetin jalaqysy men kelisimshartyn bıýdjetten tys qarajattan óteıdi, ıaǵnı demeýshilik kózden tartady, — dedi vıtse-mınıstr.

Budan buryn habarlanǵandaı, Senat «Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Zańyn maquldady. 

Onyń aıasynda Qazaqstan Respýblıkasynyń azamattary sanalmaıtyn sportshylardy bıýdjet qarajaty esebinen qarjylandyrýǵa tyıym salyndy.