Sport elimizde qazir belsendi túrde damýda - QR Dene shynyqtyrý jáne sport isteri agenttiginiń tóraǵasy
ALMATY. 6 qazan. QazAqparat - Almaty qalasynyń 2022 jylǵy qysqy Olımpıada oıyndaryn qabyldaýǵa ınfraqurylymy daıyn deýge bolady. Ony QR Dene shynyqtyrý jáne sport isteri agenttiginiń tóraǵasy Erlan Qojaǵapanov búgin kásibı veloshabandozdardyń «Almaty velotýry» kezinde aıtty.
«Ortalyq Azııa aımaǵynda tuńǵysh ret ótip jatqan bul jarys bolashaqta jyl saıyn dástúrli týrnırge aınalýy múmkin. Mundaı buqaralyq sharalar sporttyń damýyna úlken yqpalyn tıgizedi. Qazir elimizdiń barlyq aımaǵynda sport nysandary salynyp, ol qarqyndy túrde damýda. Oǵan memleket qoldan kelgen múmkindiktiń bárin jasaýda», - deıdi E. Qojaǵapanov.
Onyń aıtýynsha, elimizde ótip jatqan halyqaralyq deńgeıdegi sport dodalarynyń jıi ótýi buqaralyq sporttyń damýyna túrtki bolýda. Almaty qalasy qazirgi tańda 2022 jyly bolatyn qysqy Olımpıada oıyndarynyń ótkizýge ótinim berip otyr. Jeltoqsan aıynda endi jumys toby Lozannadaǵy semınarǵa qatysady. Almaty úmitkerge aınalsa, memleket qoldan kelgen múmkindiktiń bárin jasaýǵa daıyn. Máselen, 2017 jyly Almatyda ótetin qysqy Ýnıversıada oıyndaryna qatysýshylar 2022 jyly Olımpıada oıyndarynda da óner kórsetetin bolady. Bul olardyń sátti óner kórsetýine oń yqpalyn tıgizbek.
