Sport boıynsha synyptan tys sabaq júrgizgen muǵalimderge qosymsha aqy tólenbek

NUR-SULTAN. QazAqparat – Dene tárbıesi sabaqtarynda ulttyq sport túrleri boıynsha mindetti komponentti engizý iske asyrylady. Bul týraly QR Mádenıet jáne sport mınıstri Aqtoty Raıymqulova málim etti, dep habarlaıdy QazAqparat tilshisi.

«Úkimettiń 2020 jylǵa arnalǵan zań jobalaý jumystary josparyna sáıkes, buqaralyq sportty damytý máseleleri jónindegi keıbir zańnamalyq aktilerge ózgerister men tolyqtyrýlar engizý boıynsha zańnyń jáne buqaralyq sportty damytýdyń 2020-2025 jyldarǵa arnalǵan keshendi josparynyń jobasy ázirlendi. Dene shynyqtyrý men sportty damytý, sondaı-aq dene shynyqtyrý jáne sportpen shuǵyldanatyndardyń sanyn arttyrý maqsatynda birqatar is-sharalardy iske asyrý kózdelgen», - dep toqtaldy mınıstr Parlament Májilisindegi Úkimet saǵatynda.

Osy oraıda balalar men jasóspirimderdiń dene shynyqtyrý klýbtary jáne dárigerlik-dene shynyqtyrý dıspanserleriniń jelisin keńeıtýdi, bilim berýdiń barlyq deńgeılerinde dene tárbıesi sabaqtarynda ulttyq sport túrleri boıynsha mindetti komponentti engizýdi iske asyrý eskerilgen.

Sonymen qatar, dene shynyqtyrý jáne sport boıynsha synyptan tys sabaqtardy júrgizgeni úshin muǵalimderge qosymsha aqy engizý, halyqpen jumys isteý úshin sport nusqaýshylaryn shtattyq birliktermen qamtamasyz etý qarastyrylǵan.

Munymen qosa, oqýshylar arasynda dene shynyqtyrý men sporty tanymal etý arqyly sporttyq jarystar sanyn arttyrý sharalary júzege asyrylmaq.

«Zań jobasy dene shynyqtyrý jáne sportpen aınalysý arqyly halyqtyń salaýytty ómir saltyna umtylysyn qalyptastyrýdy kózdeıdi», - dedi A. Raıymqulova.

Taratylǵan málimetterge qaraǵanda, zań jobasyn Parlamentttiń qaraýyna 2020 jylǵy sáýir aıynda engizý josparlanyp otyr.