Sport baǵytyndaǵy qazaqy jylqy tuqymyn kóbeıtýge 701 mln teńge qajet – depýtat
Májiliste «Qazaqstan Respýblıkasynyń keıbir zańnamalyq aktilerine sporttyq baǵyttaǵy jylqylardyń qazaqy tuqymyn saqtaý jáne ósimin molaıtý máseleleri boıynsha ózgerister men tolyqtyrýlar engizý týraly» Zań jobasynyń tanystyrylymy ótip jatyr, dep habarlaıdy Kazinform.
Zań jobasyn tanystyrǵan Májilis depýtaty Aıdarbek Qojanazarov qujatty palata depýtattary ázirlegenin atap ótti.
«Zań jobasy úsh zańǵa ózgerister men tolyqtyrýlar engizýdi kózdeıdi. Ol – «Asyltuqymdy mal sharýashylyǵy týraly», «Selektsııalyq jetistikterdi qorǵaý týraly, «Agroónerkásip keshenin jáne aýyldyq aýmaqtardy damytýdy memlekettik retteý týraly» zańdar. Zań jobasynda sport baǵytyndaǵy jylqy sharýashylyǵyna memleketten qoldaý kórsetýdi kózdeıdi. Qazirgi baǵytta et, sút shyǵaratyn ónim baǵytyndaǵy jylqy sharýashylyǵyna ǵana qoldaý kórsetiledi», - deıdi Aıdarbek Qojanazrov.
Zań jobasynda asyltuqymdy ortalyqtar men sheteldik selektsııadan sport baǵytyndaǵy asyltuqymdy aıǵyrlardy satyp alý, sport baǵytyndaǵy jylqylardyń qazaqy tuqymynyń asyltuqymdy analyq basyn kóbeıtý, asyltuqymdy sport baǵytyndaǵy jylqy ustaý shyǵyndaryn sýbsıdııalaý sharalary usynylǵan.
«Zań jobasyn júzege asyrýǵa jalpy 701 mln teńge qajet. Sonyń ishinde bes jyl saıyn 140,2 mln teńge bólinedi. Respýblıka bıýdjet komıssııasynyń sheshimi boıynsha bul usynys qoldaý tapty», - dedi depýtat.
